काठमाडौं।  संघीय संसदअन्तर्गत राष्ट्रिय सभाका विभिन्न विषयगत समितिका नवनिर्वाचित सभापतिहरूले पद तथा गोपनीयताको शपथ ग्रहण गरेका छन्।

राष्ट्रिय सभाका अध्यक्ष नारायणप्रसाद दाहालले राष्ट्रिय सभा नियमावली, २०७५ को नियम २१७ क को उपनियम (२) बमोजिम नवनिर्वाचित सभापतिहरूलाई शपथ गराएका हुन्।

बुधबार सिंहदरबारस्थित लेखा समितिको हलमा आयोजित कार्यक्रममा सभापतिहरूलाई शपथ ग्रहण गराइएको हो। मंगलबार सम्पन्न समिति सभापतिको निर्वाचनमा विकास, आर्थिक मामिला तथा सुशासन समितिको सभापतिमा कृष्णप्रसाद पौडेल रहेका छन्।

त्यस्तै,विधायन व्यवस्थापन समितिको सभापतिमा कृष्णबहादुर रोकाया, सार्वजनिक नीति तथा प्रत्यायोजित विधायन समितिको सभापतिमा पूजा चौधरी तथा संघीयता सबलीकरण तथा राष्ट्रिय सरोकार समितिको सभापतिमा जयन्ती देवी राई निर्विरोध निर्वाचित भएका हुन् ।

कार्यक्रममा राष्ट्रिय सभाका पदाधिकारी, सांसद तथा सचिवालयका कर्मचारीहरूको उपस्थिति रहेको थियो।

तस्वीरहरु :