काठमाडौं । गलत नम्बरमा फोन गएको निहुँपछि झगडा हुँदा दुई युवकमाथि चक्कु प्रहार भएको छ ।

यो घटना ललितपुरको पाटनस्थित कृष्णमन्दिर अगाडि बुधबार भएको हो । घटनाका मुख्य आरोपित सन्जीब नेपालीलाई प्रहरीले पक्राउ गरेको छ ।

चक्कु प्रहार गरेर भाग्दै गरेका नेपालीलाई एक महिला प्रहरीले चक्कुसहित नियन्त्रणमा लिएको प्रहरीले जानकारी दिएको छ । नेपालीले झापाका २६ वर्षीय सिर्जन नेम्बाङ र सुमित नेम्बाङलाई चक्कु प्रहार गरेका प्रहरीले जनाएको छ ।

चक्कु प्रहारबाट घाइते भएका दुवैजनाको अवस्था गम्भीर रहेको छ । प्रहरीका अनुसार उनीहरूको बीएन्डबी अस्पतालमा उपचार भइरहेको छ ।

जिल्ला प्रहरी परिसर ललितपुरका प्रमुख एसएसपी होविन्द्र बोगटीले, ‘घटनालगत्तै पाएको सूचनाको आधारमा प्रहरीको टोली घटनास्थल पुगेर चारैतिर घेरा हालेर नियन्त्रणमा लियौँ । उनीमाथि थप अनुसन्धान भइरहेको छ ।’

घटनालगत्तै सातदोबाटो प्रहरी वृत्तका प्रमुख डीएसपी पूर्णिमा चन्द नेतृत्वको टोली र प्रहरी प्रभाग मंगलबजारको टोली घटनास्थल पुगेको थियो ।

घाइते नेम्बाङद्वय सहोदर दाजुभाइ हुन् । प्रहरीको प्रारम्भिक अनुसन्धानको क्रममा घाइते भएका नेम्बाङ दाजुभाइको फोन आरोपित सन्जीब नेपालीको नम्बरमा जाँदा सोही विषयमा विवाद भएको खुलेको छ ।

नेम्बाङ दाजुभाइ र अपरिचित नेपालीबीच फोनमै भनाभन भइ इमाडोल बस्ने नेम्बाङ दाजुभाइ नेपालीलाई भेट्न कृष्णमन्दिर पुगेका थिए ।

सन्जीब नेपाली र नेम्बाङ दाजुभाइसित भएको विवाद मिलाउन झापाकै विकास लिम्बु पनि कृष्ण मन्दिर पुगेका थिए । प्रहरीको अनुसन्धानको क्रममा विकास लिम्बुको भने नेम्बाङ दाजुभाइ र सन्जीब नेपालीसँग पनि चिनजान रहेको खुलेको प्रहरीले जनाएको छ ।

प्रहरीले विकास लिम्बुलाई पनि नियन्त्रणमा लिएर अनुसन्धान अघि बढाएको छ ।