काठमाडौं ।नेपाली कांग्रेसले पार्टीका नेता पूर्णबहादुर खड्कासँग सात दिनभित्र स्पष्टीकरण माग्ने निर्णय गरेको छ। पार्टी केन्द्रीय अनुशासन समितिको बुधबार बसेको बैठकले पूर्व उपसभापति समेत रहेका खड्कासँग लिखित स्पष्टीकरण सोध्ने निर्णय गरेको हो।

यसअघि चैत १४ गते पार्टीको लेटरहेडको दुरुपयोग गर्दै वक्तव्य जारी गरेको आरोपमा चैत १८ गते बसेको अनुशासन समितिको बैठकले उनलाई एक पटकका लागि सचेत गराएको थियो। तर त्यसपछि पनि उनले चैत ३० गते आफू हाल नभएको जिम्मेवारीसमेत उल्लेख गर्दै पार्टी जिम्मेवारीमै रहेको दाबी गरेका थिए। साथै उनले सोही सन्दर्भमा प्रेस विज्ञप्ति समेत सार्वजनिक गरेका थिए।

अनुशासन समितिका अनुसार खड्काको उक्त गतिविधि पार्टी विधान विपरीत देखिएको छ। त्यसैले नेपाली कांग्रेसको विधान २०१७ (संशोधन सहित) को धारा ३४ को उपधारा ८ (घ) अनुसार उनलाई सात दिनभित्र स्पष्टीकरण पेश गर्न भनिएको हो।