काठमाडौं । कञ्चनपुरको बेलडाँडी गाउँपालिका उपाध्यक्ष शान्ति नाथलाई प्रहरीले ज्यानसम्बन्धी मुद्दामा पक्राउ गरेको छ। उनीलाई जिल्ला अदालतले पक्राउ पुर्जी जारी गरेपछि महेन्द्रनगरबाट पक्राउ गरिएको जिल्ला प्रहरी कार्यालय कञ्चनपुरका प्रवक्ता, प्रहरी नायब उपरीक्षक हेमबहादुर शाहीले जानकारी दिए।

गत ९ वैशाखमा बेलडाँडी गाउँपालिका-३ कमरीका भैँसीपालक किसान हरकिशन राना बेलौरी नगरपालिका-१०, शिवनगरस्थित निर्मल आर्यघाट नजिकै मोटरसाइकलसहित जलेको अवस्थामा मृत फेला परेका थिए। घटनापछि रानाकी श्रीमतीले उपाध्यक्ष नाथविरुद्ध किटानी जाहेरी दिएकी थिइन्।

स्थानीयका अनुसार, प्रदेश सरकारले भैँसीपालक किसान समूहका लागि पठाएको अनुदान वितरणको विषयमा मृतक राना र उपाध्यक्ष नाथबीच विवाद चलेको थियो।

उक्त घटनाका दोषीलाई कारबाही गर्नुपर्ने माग उठ्दै आएको छ। यही विषयलाई उठाउँदै कञ्चनपुर-२ बाट प्रतिनिधिसभामा निर्वाचित सांसद दीपक बोहराले केही दिनअघि संसदमा आवाज उठाएका थिए।