एजेन्सी। संयुक्त राष्ट्रसङ्घका महासचिव एन्टोनियो गुटेरेसले अन्तर्राष्ट्रिय कानुनको उल्लङ्घन बढ्दै जाँदा विश्वव्यापी विश्वास कमजोर हुँदै गएको बताएका छन्। उनले अन्तर्राष्ट्रिय अदालतका निर्णयहरू संयुक्त राष्ट्रसङ्घको बडापत्रअनुसार बाध्यकारी भएकाले तिनको प्रभावकारी कार्यान्वयन आवश्यक रहेकोमा जोड दिएका हुन् ।

अन्तर्राष्ट्रिय अदालतको ८० औँ वार्षिकोत्सवका अवसरमा जारी सन्देशमा उनले विगत आठ दशकमा अन्तर्राष्ट्रिय न्याय प्रणालीलाई मजबुत बनाउन अदालतले महत्वपूर्ण योगदान दिएको उल्लेख गरेका छन्। साथै, अदालतको स्वतन्त्रता र विश्वसनीयता जोगाउँदै विवादहरूको समाधान शान्तिपूर्ण माध्यमबाट खोज्नुपर्नेमा उनले आग्रह गरेका छन्।

उनले सशस्त्र द्वन्द्वको विस्तार, नियमविपरीतका सैन्य गतिविधि तथा मानवीय दायित्व पूरा गर्न नसकिने अवस्थाले अन्तर्राष्ट्रिय कानुन उल्लङ्घन तीव्र बन्दै गएको बताए। यसले न्यायिक संस्थाहरूप्रति अविश्वास र चुनौती बढाइरहेको उनको भनाइ छ।

गुटेरेसले विधिको शासनलाई बेवास्ता गर्दै बल प्रयोगलाई प्राथमिकता दिने प्रवृत्तिले विश्वमा थप द्वन्द्व र अस्थिरता निम्त्याउने चेतावनी दिएका छन्।