उदयपुर। उदयपुरको चौदण्डीगढी नगरपालिका-७ बल्टार बजारमा छिमेकी–छिमेकीबीचको विवादका क्रममा एक जनाको ज्यान गएको छ।

जिल्ला प्रहरी कार्यालय उदयपुरका अनुसार आइतबार राति करिब ८:१५ बजे भएको घटनामा ७३ वर्षीय रामप्रसाद राईले छिमेकी ६४ वर्षीय माहाशेर राईमाथि धारिलो हतियार प्रहार गरेका हुन् ।

प्रहरीका अनुसार विवादपछि आवेगमा आएको आक्रमण हुँदा माहाशेर राईको छातीको दायाँ माथिल्लो भागमा गहिरो चोट लागेको थियो। घाइतेलाई उपचारका लागि नगर अस्पताल बेल्टार लैजाने क्रममा बाटोमै उनको मृत्यु भएको चिकित्सकले पुष्टि गरेका छन्।

घटनापछि धारिलो हतियार प्रहार गर्ने रामप्रसाद राईलाई इलाका प्रहरी कार्यालय बेल्टारबाट खटिएको टोलीले नियन्त्रणमा लिएको छ। उनलाई आवश्यक अनुसन्धानका लागि प्रहरी कार्यालयमा राखिएको जिल्ला प्रहरी कार्यालय उदयपुरले जनाएको छ।

प्रहरीले घटनाबारे थप अनुसन्धान भइरहेको जनाएको छ।