रौतहट। रौतहट प्रहरीले लाखौँ रुपैयाँ बराबरको भन्सार छलिको सामानसहित एक जनालाई पक्राउ गरेको छ ।

इलाका प्रहरी कार्यालय मौलापुरबाट खटिएको टोलीले मौलापुर नगरपालिका-३ बाट ज १ च १३४३ नम्बरको पिकअप गाडीमा अवैध रूपमा भन्सार छली गरी ल्याइएको २,९०० किलोग्राम तोरी र ३५० किलोग्राम सरसोंसहित गाडी र चालकलाई नियन्त्रणमा लिएको हो ।

पक्राउ पर्नेमा सर्लाहीको लालबन्दी नगरपालिका-७ का २५ वर्षीय पवन साह रहेका छन् । उनले भारतबाट करिब ३ लाख ९० हजार रुपैयाँ बराबरको तोरी र सरसों ल्याएका थिए भने पिकअप गाडीको मूल्य करिब २० लाख रुपैयाँ रहेको प्रहरीले जनाएको छ ।

त्यस्तै, प्रहरीले भारतबाट दुई वटा जर्किनमा भरी भन्सार छली गरी नेपालतर्फ ल्याउँदै गरेको अवस्थामा १० हजार ५३० रुपैयाँ बराबरको डिजेलसहित बीआर ०५ एल ४५६० नम्बरको करिब ५० हजार रुपैयाँ मूल्य बराबरको मोटरसाइकल पनि बरामद गरेको छ ।

बरामद गरिएको अवैध सामान, सवारी साधन र चालकसहित करिब २४ लाख ५० हजार ५३० रुपैयाँ बराबरको सामग्री आवश्यक कारबाहीका लागि गौर भन्सार कार्यालय, रौतहटमा बुझाइएको प्रहरी नायब उपरीक्षक विष्णु प्रदीप बस्यालले जानकारी दिएका छन् ।