काठमाडौं । राष्ट्रिय स्वतन्त्र पार्टीले पार्टीको पहिलो महाधिवेशन आगामी असार ७ देखि ९ गतेसम्म चितवनमा आयोजना गर्ने निर्णय गरेको छ ।

बुधबार बनस्थलीस्थित पार्टी केन्द्रीय कार्यालयमा बसेको केन्द्रीय समिति बैठकले स्थापना दिवसको अवसर पारेर महाधिवेशन गर्ने निर्णय गरेको रास्वपा नेता प्रकाशचन्द्र परियारले जानकारी दिए ।

उनका अनुसार महाधिवेशनको मिति तय भएसँगै पार्टी केन्द्रीय समिति आयोजक समितिमा रूपान्तरण भएको छ ।

बैठकले महाधिवेशन सम्पन्न गर्न विभिन्न उपसमितिहरू समेत गठन गरेको छ । महाधिवेशनमा ७७ वटै जिल्लाबाट कम्तीमा २५ सय प्रतिनिधिको सहभागिता रहने अनुमान गरिएको नेता परियारले बताए ।

उनले भने, ‘महाधिवेशनको तयारीलाई व्यवस्थित बनाउन विभिन्न उपसमिति गठन गरिएको छ । देशभरबाट प्रतिनिधिहरू सहभागी हुनेछन् ।’

बैठकले प्रदेश अधिवेशनको कार्यतालिकासमेत तय गरेको छ । जसअनुसार जेठ २६ गते वाग्मती, २७ गते कोसी, २८ गते मधेस, २९ गते गण्डकी, ३० गते लुम्बिनी, ३१ गते कर्णाली र असार १ गते सुदूरपश्चिम प्रदेश अधिवेशन आयोजना गरिनेछ ।

पालिका अधिवेशन पनि आयोजना गर्ने तयारी गरिएको र पालिका अधिवेशन हुन नसकेको अवस्थामा हालका पालिका संयोजकलाई नै महाधिवेशन प्रतिनिधि बनाइने व्यवस्था गरिएको परियारले जानकारी दिए ।