काठमाडौं। गृह मन्त्रालयले राजपत्रांकित प्रथम श्रेणीका कर्मचारीहरूको व्यापक सरुवा तथा पदस्थापन गरेको छ।

मन्त्रालयले जेठ १३ र २२ गते गरेका निर्णयअनुसार उपसचिव, प्रमुख जिल्ला अधिकारी (सीडीओ) तथा सहसचिव तहका कर्मचारीहरूलाई विभिन्न जिल्ला र निकायमा खटाएको हो।

सरुवाअनुसार गृह मन्त्रालयमा कार्यरत सहसचिव निराजन घिमिरे स्याङ्जा, कुमानसिंह गुरुङ कास्की, लक्ष्मी पाण्डे गौतम धादिङ र बलराम निरौला भैरहवास्थित अध्यागमन कार्यालयमा सरुवा भएका छन्।

त्यसैगरी मन्त्रालयले १५ जिल्लाका प्रमुख जिल्ला अधिकारीहरूको समेत हेरफेर गरेको छ। नयाँ पदस्थापनासँगै सम्बन्धित जिल्लाहरूमा प्रशासनिक नेतृत्व परिवर्तन हुने भएको छ।