काठमाडौं । नेकपा एमालेका महासचिवले सरकारमाथि उठेका प्रश्नहरूको प्रतिरक्षा गर्न सभामुख स्वयं अघि सर्नु संसदीय अभ्यास र मर्यादाअनुसार उपयुक्त नहुने बताएका छन्।

उनले संसद् सरकार र प्रतिपक्षबीचको बहस तथा जवाफदेहिताको थलो भएकाले सरकारको पक्षमा तर्क प्रस्तुत गर्ने जिम्मेवारी सम्बन्धित मन्त्री तथा सत्तापक्षका सांसदहरूको हुने उल्लेख गरे।

‘सरकारमाथि उठेका प्रश्नहरूको प्रतिरक्षा र विपक्षीसँगको बहसमा सभामुख स्वयं उत्रिनु उचित होइन। संसदीय खेलका खेलाडी सांसदहरू नै हुन्,’ उनले लेखेका छन्।

महासचिवले सभामुखको भूमिका संसद्को कार्य सञ्चालनलाई निष्पक्ष र मर्यादित ढंगले अघि बढाउने भएको उल्लेख गर्दै कुनै पनि पक्षको पक्षधर देखिने गतिविधिबाट बच्नुपर्ने धारणा राखे।

उनले संसदीय लोकतन्त्रको सफलताका लागि सभामुखको निष्पक्षता सबै दलले अनुभूति गर्न सक्ने वातावरण आवश्यक रहेको पनि बताए।