शान्तिका लागि सन्देश पत्र छाडेर इरानी टोली बाहिरिए अमेरिकाबाट

Nepal One HD ९ असार २०८३ १४:२१

खेलकुद

शान्तिका लागि सन्देश पत्र छाडेर इरानी टोली बाहिरिए अमेरिकाबाट

एजेन्सी। युरुग्वेसँगको खेल सम्पन्न भएपछि इरानी राष्ट्रिय फुटबल टोलीले अमेरिकाको लस एन्जलसस्थित सोफी स्टेडियमको ड्रेसिङ रुममा हस्तलिखित पत्र छोडेको छ।

खेलपछि तत्काल अमेरिका छोड्नुपर्ने अवस्थाबीच टोलीले भावनात्मक सन्देश लेखेर फर्किएको हो।

इरानी फुटबल महासंघले सार्वजनिक गरेको उक्त पत्रमा टोलीले आफ्नो ऐतिहासिक पहिचान, राष्ट्रिय भावना र समर्थकप्रति आभार व्यक्त गरेको छ। खेल संरचनाअनुसार टोलीलाई प्रत्येक खेलपछि अमेरिका छोडेर मेक्सिको जानुपर्ने व्यवस्था रहेको जनाइएको छ।

पत्रमा लेखिएको छ, ‘हजारौं वर्ष पुरानो प्राचीन पर्सियादेखि आजको आधुनिक इरानसम्म, इरानको आत्मा सधैं जीवित र अटल छ।’ टोलीले लस एन्जलसका आयोजक, फिफा, स्थानीय समुदाय तथा दर्शकप्रति पनि धन्यवाद व्यक्त गरेको छ।

पत्रमा अर्को भागमा भनिएको छ, ‘हामी यहाँ गर्वका साथ आएका थियौं, सम्मानका साथ प्रतिस्पर्धा गर्‍यौं र अब आत्मसम्मानका साथ फर्किंदैछौं।’ समर्थकहरूको समर्थनप्रति विशेष धन्यवाद दिँदै टोलीले विश्वभर शान्ति, सम्मान र मित्रताको सन्देश फैलाउन आह्वान गरेको छ।

पत्रमा उल्लेख गरिएको छ, ‘हाम्रो साथमा आफ्नो मन, आवाज र आत्मा लगाएर १८० मिनेटसम्म समर्थन गर्ने प्रत्येक इरानीलाई धन्यवाद। सबै राष्ट्रबीच शान्ति, सम्मान र मित्रता कायम रहोस्।’

त्यसैबीच, पत्रमा रातो मसीले ‘७६८’ र ‘मिनाब’ भन्ने शब्द पनि लेखिएको भेटिएको छ, जसलाई केही स्रोतहरूले इरान–इजरायल तनावसँग जोडिएको घटनाप्रति संकेत गरेको रूपमा व्याख्या गरेका छन्।

खेल तालिकाअनुसार इरानी टोली खेलको अघिल्लो दिन मात्र प्रतियोगिता हुने सहरमा पुग्ने र खेल सकिएलगत्तै पुनः देश बाहिरिने व्यवस्था रहेको बताइएको छ।

विश्वकपको समूह ‘जी’ अन्तर्गत इरानले हालसम्म दुई खेल खेलेको छ। पहिलो खेलमा न्युजिल्यान्डसँग २-२ को बराबरी खेल्दै अंक बाँडेको इरानले दोस्रो खेलमा बेल्जियमसँग गोलरहित बराबरी खेलेको थियो।

समूहमा इजिप्ट चार अंकसहित शीर्ष स्थानमा छ भने दुई अंकसहित इरान नकआउट चरण प्रवेशको दौडमा रहेको छ। अन्तिम खेलमा इजिप्टसँग बराबरी नतिजा निकालेमा इरानको नकआउट सम्भावना कायम रहनेछ।