काठमाडौं। बाजुराको बुढीनन्दा नगरपालिकाका उपमेयर रामबहादुर बोहरामाथि एक स्थानीय शिक्षकमाथि कुटपिट गरेको आरोप लागेको छ।

उक्त घटनाको भिडियो सार्वजनिक भएपछि सामाजिक सञ्जालमा व्यापक चर्चा भइरहेको छ।

सार्वजनिक भिडियोमा उपमेयर बोहराले शिक्षक प्रेम विष्टमाथि मुक्का र लात प्रहार गरेको देखिन्छ। घटना नगरपालिका कार्यालय भवनको मूल प्रवेशद्वारमै भएको बताइएको छ।

प्रत्यक्षदर्शीका अनुसार कुटपिट भइरहँदा कार्यालयका कर्मचारी, सेवाग्राही तथा अन्य उपस्थित व्यक्तिहरूले घटनालाई प्रत्यक्ष देखेका थिए। घटनापछि त्यहाँ केहीबेर तनावसमेत सिर्जना भएको जनाइएको छ।

घटनाको कारण भने तत्काल खुल्न सकेको छैन। साथै, यस विषयमा उपमेयर बोहरा वा नगरपालिकाको आधिकारिक प्रतिक्रिया पनि सार्वजनिक भएको छैन।

भिडियो सार्वजनिक भएसँगै जनप्रतिनिधिको आचरण, सार्वजनिक पदको जिम्मेवारी तथा कार्यालय परिसरमै भएको घटनाबारे सामाजिक सञ्जालमा विभिन्न प्रतिक्रिया आइरहेका छन्।

घटनाबारे थप अनुसन्धान तथा सम्बन्धित निकायको धारणा आउन बाँकी छ।

भिडियो सामाजिक सञ्जाल :