काठमाडौं। पाकिस्तानको इस्लामावादमा जारी काभा पुरुष भलिबल च्याम्पियनसिपअन्तर्गत नेपालले आज प्रतियोगिताको तेस्रो खेलमा घरेलु टोली पाकिस्तानको सामना गर्दैछ।

नेपाली टोली लगातार दुई हारपछि पहिलो जितको खोजीमा मैदान उत्रिँदै गर्दा पाकिस्तान भने अपराजित यात्रालाई निरन्तरता दिने लक्ष्यमा हुनेछ।

नेपाल र पाकिस्तानबीचको खेल इस्लामावादस्थित गारिसन जिन्नाह स्पोर्ट्स कम्प्लेक्समा नेपाली समयअनुसार साँझ ५:४५ बजे सुरु हुनेछ। यसअघि खेल अपराह्न ४:१५ बजेका लागि तय गरिएको भए पनि शुक्रबारको प्रार्थनाको समयलाई ध्यानमा राख्दै आयोजकले खेल तालिका परिवर्तन गरेको हो।

आजकै दिन प्रतियोगिताअन्तर्गत उज्वेकिस्तान र श्रीलंकाबीच पहिलो तथा बंगलादेश र काजकिस्तानबीच दोस्रो खेल पनि हुनेछ।

घरेलु समर्थकको साथ पाएको पाकिस्तान प्रतियोगितामा उत्कृष्ट लयमा देखिएको छ। सुरुवाती दुवै खेल जित्दै उसले ६ अंकसहित अंक तालिकाको शीर्ष स्थानमा आफूलाई बलियो बनाएको छ।

नेपालले भने हालसम्म खेलेका दुवै खेलमा हार बेहोरे पनि प्रतिस्पर्धात्मक प्रदर्शन गरेको थियो। दुवै खेल पाँच सेटसम्म पुगेका थिए, तर निर्णायक क्षणमा चुकेपछि नेपाल जितबाट वञ्चित बनेको थियो।

आजको खेल नेपालका लागि प्रतियोगितामा पुनरागमन गर्ने अवसरका रूपमा हेरिएको छ।

बलियो पाकिस्तानविरुद्ध सकारात्मक नतिजा निकाल्न सके नेपालले आत्मविश्वासका साथै अंक तालिकामा पनि महत्वपूर्ण सुधार गर्नेछ।