काठमाडौं। अख्तियार दुरुपयोग अनुसन्धान आयोगले काठमाडौं महानगरपालिका–३० का लेखा अधिकृत उद्धव भट्टराईलाई घुस लिएको आरोपमा पक्राउ गरेको छ।

अख्तियारका अनुसार उनलाई शुक्रबार २१ हजार रुपैयाँ घुस रकमसहित रंगेहात नियन्त्रणमा लिइएको हो।

अख्तियारका प्रवक्ता सुरेश न्यौपानेद्वारा जारी विज्ञप्तिअनुसार स्थायी लेखा नम्बर (प्यान) बन्द गर्न आवश्यक पर्ने वडा कार्यालयको सिफारिस उपलब्ध गराइदिने भन्दै भट्टराईले सेवाग्राहीसँग घुस रकम मागेका थिए।

सेवाग्राहीबाट मागिएको रकम बुझिसकेको अवस्थामा अख्तियारको टोलीले उनलाई नियन्त्रणमा लिएको जनाएको छ।

हाल भट्टराईलाई अख्तियारको हिरासतमा राखी घटनासम्बन्धी थप अनुसन्धान भइरहेको आयोगले जनाएको छ।

अख्तियारले सार्वजनिक सेवा प्रवाहमा हुने भ्रष्टाचार र घुस लेनदेनविरुद्ध कारबाहीलाई निरन्तर अघि बढाइरहेको जनाएको छ।