काठमाडौं। भूमिगत जलस्रोत तथा सिँचाइ विकास डिभिजन सर्लाहीका डिभिजन प्रमुख अनुपमा ढकाल र मेकानिकल अधिकृत तुलाकान्त चौधरी घुस लिएको आरोपमा पक्राउ परेका छन्।

अख्तियार दुरुपयोग अनुसन्धान आयोगले बोरिङ र मोटर जडानको काम सम्पन्न भएपछि भुक्तानीका क्रममा सेवाग्राहीसँग घुस मागेको भन्ने उजुरीका आधारमा उनीहरूलाई नियन्त्रणमा लिएको हो।

अख्तियारका प्रवक्ता सुरेश न्यौपानेका अनुसार बर्दिबासस्थित कार्यालयबाट खटिएको टोलीले डिभिजन प्रमुखको सरकारी क्वार्टरबाटै ढकाल र चौधरीलाई ७ लाख ५० हजार रुपैयाँ घुस लिइसकेको अवस्थामा पक्राउ गरेको हो।

पक्राउका क्रममा उनीहरूको साथबाट स्रोत नखुलेको थप ७१ हजार ११५ रुपैयाँ नगदसमेत बरामद भएको अख्तियारले जनाएको छ।

अनुसन्धानका क्रममा दुवै जनाबाट तीनवटा मोबाइल फोन पनि बरामद गरिएको छ। अख्तियारले घटनाबारे थप अनुसन्धान अघि बढाएको जनाएको छ।