काठमाडाैं। २०२३ मा निर्माण सम्पन्नको उद्देश्य लिएर २०१९ मा केपी ओलीले शिलान्यास गरेको नागढ़ुंगा-सिस्ने खोला सुरुङमार्ग सोमबार देखि सुचारु हुँदैछ। 

सोमबारदेखि सिस्नेखोला-बलम्बु सुरूङमार्गमा सीमित रूपमा सवारी सञ्चालन सुरु हुने भएको छ। आयोजनाका अनुसार प्रारम्भिक चरणमा एम्बुलेन्स, दमकल, नेपाल प्रहरी तथा अन्य सुरक्षा निकायका आपतकालीन सवारीसाधनलाई मात्र प्रवेश दिइनेछ।

मोटरसाइकल, तीनपांग्रे सवारी तथा पेट्रोल, डिजेल, एलपी ग्यासलगायत अत्यधिक प्रज्वलनशील वा विस्फोटक पदार्थ बोकेका सवारीसाधनलाई भने सुरूङमार्ग प्रयोग गर्न अनुमति दिइने छैन। पैदलयात्रीलाई पनि सुरूङमार्गबाट आवतजावत गर्न दिइने छैन।

आयोजनाका प्रमुख पन्थीका अनुसार अन्य मापदण्ड पूरा गर्ने सवारीसाधनलाई चरणबद्ध रूपमा सञ्चालनको अनुमति दिइनेछ। साथै, सञ्चालन सुरु भएको पहिलो १५ दिनसम्म कुनै पनि शुल्क नलिने र त्यसपछि शुल्क कार्यान्वयन गर्ने विषयमा आवश्यक निर्णय गरिने उनले बताए।

निर्धारित शुल्कअनुसार कार, भ्यान, पिकअप, ट्र्याक्टर, माइक्रोबस तथा अन्य हलुका सवारीसाधनले काठमाडौं प्रवेश गर्दा ६५ रुपैयाँ र बाहिरिँदा ६० रुपैयाँ तिर्नुपर्नेछ।

त्यस्तै, मिनीबस तथा मिनी टिपर/ट्रकका लागि काठमाडौं प्रवेश शुल्क ११५ रुपैयाँ र बाहिरिने शुल्क ८० रुपैयाँ तोकिएको छ। बस तथा सिंगल रियर एक्सल ट्रकले प्रवेश गर्दा २६० रुपैयाँ र बाहिरिँदा २०० रुपैयाँ शुल्क तिर्नुपर्नेछ।

मल्टी एक्सल ट्रक तथा भारी उपकरण बोकेका सवारीसाधनका लागि काठमाडौं प्रवेश शुल्क ६०० रुपैयाँ र बाहिरिने शुल्क २५० रुपैयाँ निर्धारण गरिएको छ।

सिस्नेखोला-बलम्बु सुरूङमार्गले धादिङको सिस्नेखोला र काठमाडौंको बलम्बुलाई प्रत्यक्ष रूपमा जोड्नेछ। हाल पृथ्वी राजमार्ग हुँदै यी दुई स्थानबीचको दूरी करिब ८ किलोमिटर रहेकोमा सुरूङमार्ग सञ्चालनमा आएपछि यो दूरी करिब ५ किलोमिटरमा झर्नेछ। यससँगै करिब २.८ किलोमिटर दूरी छोटिने र यात्राको समयसमेत उल्लेखनीय रूपमा बचत हुने अपेक्षा गरिएको छ।