काठमाडौं। रोयल च्यालेन्जर्स बेंगलुरु (आरसीबी) इन्डियन प्रिमियर लिग (आईपीएल) को सबैभन्दा मूल्यवान् फ्रेन्चाइजका रूपमा लगातार शीर्ष स्थानमा कायम रहेको छ।

अमेरिकास्थित लगानी बैंक हुलिहान लोकीले सार्वजनिक गरेको पछिल्लो प्रतिवेदनअनुसार आरसीबीको ब्रान्ड मूल्य ३१ करोड २० लाख अमेरिकी डलर पुगेको छ। गत वर्ष यसको ब्रान्ड मूल्य २६ करोड ९० लाख अमेरिकी डलर रहेकोमा यसपटक १६ प्रतिशतले वृद्धि भएको हो।

यससँगै आरसीबी क्रिकेट इतिहासमै ३० करोड अमेरिकी डलरभन्दा बढी ब्रान्ड मूल्य कायम गर्ने पहिलो टोली बनेको छ।

प्रतिवेदनअनुसार पछिल्लो एक वर्षमा आईपीएलको कुल व्यावसायिक मूल्य पनि बढेको छ। आईपीएलको व्यावसायिक मूल्य १८.५ अर्ब अमेरिकी डलरबाट बढेर २०.६ अर्ब अमेरिकी डलर पुगेको छ। यो एक वर्षमा ११.४ प्रतिशतको वृद्धि हो। आईपीएलले लगातार दोस्रो वर्ष दोहोरो अंकको व्यावसायिक वृद्धि हासिल गरेको प्रतिवेदनमा उल्लेख छ।

चार महिनाअघि ब्ल्याकस्टोन, बोल्ट भेन्चर्स, आदित्य बिर्ला समूह र टाइम्स अफ इन्डिया समूहको संयुक्त लगानीकर्ताले आरसीबीलाई १.७८ अर्ब अमेरिकी डलर मूल्यांकनमा खरिद गरेका थिए।

ब्रान्ड मूल्यका आधारमा मुम्बई इन्डियन्स २६ करोड ४० लाख अमेरिकी डलरसहित दोस्रो स्थानमा छ। कोलकाता नाइट राइडर्स २४ करोड ५० लाख डलरसहित तेस्रो र चेन्नई सुपर किङ्स २४ करोड ४० लाख डलरसहित चौथो स्थानमा छन्।

त्यस्तै, सनराइजर्स हैदराबाद १६ करोड ८० लाख डलरसहित पाँचौं, राजस्थान रोयल्स १६ करोड १० लाख डलरसहित छैटौं र पञ्जाब किङ्स १५ करोड ८० लाख डलरसहित सातौं स्थानमा छन्।

गुजरात टाइटन्स १५ करोड ७० लाख डलरसहित आठौं, दिल्ली क्यापिटल्स १५ करोड ६० लाख डलरसहित नवौं तथा लखनउ सुपर जायन्ट्स १२ करोड २० लाख डलरसहित दशौं स्थानमा छन्।

आरसीबीका सह–मालिक सत्यन गजवानीले टोलीको ठूलो समर्थक आधार र समर्थकसँगको भावनात्मक सम्बन्धलाई आरसीबीको प्रमुख शक्ति बताएका छन्।

पञ्जाब किङ्सका सह–मालिक नेस वाडियाले पनि आईपीएल फ्रेन्चाइजहरू अब दुई महिनाको क्रिकेट प्रतियोगितामा सीमित नभई दीर्घकालीन खेल तथा मनोरञ्जन व्यवसायका रूपमा विकसित हुँदै गएको बताएका छन्।