काठमाडौं। पाकिस्तानको ब्रड पिकमा हिमपहिरोपछि सम्पर्कविहीन भएका नेपाली पर्वतारोहीको खोज तथा उद्धारका लागि पर्यटन विभागले इस्लामाबादस्थित नेपाली दूतावासलाई पाकिस्तान सरकारसँग समन्वय गर्न निर्देशन दिएको छ।

विभागका अनुसार ब्रड पिकमा छ जना नेपाली पर्वतारोही सम्पर्कविहीन छन्। पाकिस्तानमा रहेका नेपाली पर्वतारोहण कम्पनीहरूले पनि घटनास्थलमा पुगेर स्थानीय अधिकारीसँग समन्वय गर्दै खोज तथा उद्धार अभियानमा सहभागी हुने तयारी गरेका छन्।

पर्यटन विभागका प्रवक्ता हिमाल गौतमका अनुसार पाकिस्तानमा नेपाली शेर्पा तथा पर्वतारोहण कम्पनीहरूको उल्लेखनीय उपस्थिति रहेकाले उनीहरूबीच खोज तथा उद्धारका लागि समन्वय भइरहेको छ।

गौतमले घटनालाई ‘अभूतपूर्व’ भन्दै विभिन्न स्रोतबाट आएका विरोधाभासपूर्ण सूचनाका कारण अझै केही आशा बाँकी रहेको बताएका छन्।

हिमपहिरोपछि नेपाली पर्वतारोही निर्मल पुर्जा ‘निम्स दाई’सहित १० जना आरोही सम्पर्कविहीन भएका थिए। घटनास्थलबाट चार जनाको शव फेला परेको छ भने उनीहरूको पहिचान हुन बाँकी छ।

खोज तथा उद्धारका लागि पाकिस्तानी सेनाका हेलिकप्टरसहित स्थल टोली परिचालन गरिएको छ।