काठमाडौं। विश्व फुटबल महासंघ (फिफा) अध्यक्ष जियानी इन्फान्टिनोले विश्वकपसहित फिफाका प्रमुख प्रतियोगितामा निजी लगानी भित्र्याउने विवादास्पद योजना फिर्ता लिएका छन्।

विश्व फुटबलभित्र व्यापक विरोध भएपछि इन्फान्टिनोले प्रस्तावले फुटबल समुदायमा विभाजन सिर्जना गरेको भन्दै अब योजना अघि नबढाउने घोषणा गरेका हुन्।

फिफाले विश्वकपलगायत प्रमुख प्रतियोगिताको व्यावसायिक व्यवस्थापन गर्न ‘फिफा फरवार्ड इन्टरप्राइज’ नामक नयाँ कम्पनी स्थापना गरी त्यसको करिब २० प्रतिशत हिस्सा निजी लगानीकर्तालाई बिक्री गरेर ४.२ अर्ब अमेरिकी डलरसम्म जुटाउने योजना बनाएको थियो।

यस योजनाको समर्थन गरे फिफाका २११ सदस्य राष्ट्रलाई आर्थिक सहायता बढाउने प्रस्तावसमेत गरिएको थियो। तर, युरोपेली फुटबल महासंघ (यूईएफए) का ५५ सदस्य राष्ट्रले योजना अघि बढे फिफाका प्रतियोगिता बहिष्कार गर्ने चेतावनी दिएपछि प्रस्ताव संकटमा परेको थियो।

उत्तर, मध्य अमेरिका तथा क्यारेबियन फुटबल महासंघ (कोनकाकाफ) ले पनि प्रस्ताव अस्वीकार गरेको थियो भने एसियाली फुटबल महासंघ (एएफसी) ले यूईएफए र कोनकाकाफसँग ऐक्यबद्धता जनाएपछि फिफाभित्र प्रस्ताव पारित हुने सम्भावना कमजोर बनेको थियो।

फिफाका २११ सदस्य राष्ट्रमध्ये प्रस्ताव पारित गर्न कम्तीमा १०६ मत आवश्यक पर्ने थियो। तर यूईएफएका ५५, कोनकाकाफका ३५ र एएफसीका ४६ सदस्यको मत जोड्दा १३६ मत प्रस्तावको विपक्षमा जाने अवस्था बनेको थियो।

इन्फान्टिनोले ‘फिफा फरवार्ड इन्टरप्राइज’मार्फत पुरुष तथा महिला विश्वकपसहित फिफाका प्रमुख प्रतियोगिताको व्यावसायिक गतिविधि सञ्चालन गर्ने योजना अघि सारेका थिए। बाह्य लगानीकर्तालाई कम्पनीमा अल्पमत तथा नियन्त्रणरहित स्वामित्व दिने प्रस्ताव थियो।

योजनाअनुसार सदस्य संघहरूले प्रस्ताव स्वीकार गरे प्रारम्भिक रूपमा दुई करोड अमेरिकी डलर प्राप्त गर्ने र आगामी वर्षहरूमा विकास सहायता बढाउने प्रस्ताव गरिएको थियो।

अमेरिकी भेन्चर क्यापिटल कम्पनी ‘थ्राइभ इटरनल’ सम्भावित लगानीकर्ता समूहको नेतृत्व गर्ने अपेक्षा गरिएको थियो। उक्त कम्पनी अमेरिकी राष्ट्रपति डोनाल्ड ट्रम्पका ज्वाइँ जारेड कुशनरका भाइ जोशुआ कुशनरले स्थापना गरेका हुन्।

तर निजी लगानी भित्र्याउँदा विश्वकपजस्तो प्रतियोगितामा खेलको हितभन्दा व्यावसायिक नाफा प्राथमिकतामा पर्ने भन्दै यूईएफएलगायतका महासंघहरूले विरोध गरेका थिए।

इन्फान्टिनोका वरिष्ठ रणनीतिक सल्लाहकार कार्लोस कोर्डेरोले पनि योजनाप्रति असन्तुष्टि जनाउँदै राजीनामा दिएका थिए। उनले प्रस्तावलाई ‘फुटबलका लागि खराब सम्झौता’ भन्दै फुटबलको भविष्य नै जोखिममा पर्न सक्ने बताएका थिए।

योजना फिर्ता लिएसँगै इन्फान्टिनोमाथि राजनीतिक तथा प्रशासनिक दबाब बढेको छ। उनी आगामी मार्चमा मोरक्कोमा हुने फिफा कांग्रेसबाट चौथो कार्यकालका लागि पुनः अध्यक्ष बन्ने तयारीमा छन्।

केही दिनमै तीव्र रूपमा विकसित भएको घटनाक्रमले फिफाको व्यावसायिक संरचना, शासन प्रणाली र विश्व फुटबलमा महादेशीय महासंघहरूको भूमिकाबारे नयाँ बहससमेत जन्माएको छ।

इन्फान्टिनोले भने प्रस्ताव फिर्ता लिएर विवादलाई तत्कालका लागि टुंग्याएका छन्।