काठमाडौं । नेपाल आयल निगमको कार्यकारी निर्देशक पदमा नागेन्द्र साह नियुक्त भएका छन्। मन्त्रिपरिषद्को बुधबार बसेको बैठकले खुला प्रतिस्पर्धाबाट छनोट भएका साहलाई निगमको नेतृत्व दिने निर्णय गरेको हो।

उद्योग, वाणिज्य तथा आपूर्ति मन्त्रालयले कार्यकारी निर्देशक नियुक्तिका लागि खुला प्रतिस्पर्धा आह्वान गरेको थियो। छनोट प्रक्रियामा साहसँगै प्युठानका कौशल केसी र सप्तरीका सञ्जीवकुमार देव प्रतिस्पर्धामा थिए। अन्तिम छनोटमा साहलाई कार्यकारी निर्देशक बनाउने निर्णय भएको हो।

साह नेपाल आयल निगमकै पूर्वनिमित्त कार्यकारी निर्देशक हुन्। निगममा काम गरेको अनुभवका आधारमा उनी यसअघि पनि उच्च तहको व्यवस्थापकीय जिम्मेवारीमा रहिसकेका छन्।

यसअघि निगमको कार्यकारी निर्देशकमा चण्डिका भट्ट थिए। सरकारले यसअघिका नियुक्तिहरू बदर गर्ने निर्णय गरेपछि भट्टको कार्यकारी निर्देशक पद पनि कायम रहेन।

नयाँ नेतृत्व आएसँगै पेट्रोलियम पदार्थको आपूर्ति तथा वितरण व्यवस्थापन, निगमको प्रशासनिक सुधार र संस्थागत प्रभावकारिताका विषयमा साहको भूमिकालाई चासोका साथ हेरिएको छ।