काठमाडौं। सरकारले चालु आर्थिक वर्ष २०८३/८४ का लागि बजेटमार्फत घोषणा गरेको नयाँ तलबमान तथा कर्मचारीको सुविधा स्वीकृत गरेको छ। नयाँ तलबमान साउन १ गतेदेखि लागू हुने गरी मन्त्रिपरिषद्ले स्वीकृत गरेको हो।

अर्थ मन्त्रालयको प्रस्तावमा बसेको मन्त्रिपरिषद् बैठकले निजामती कर्मचारीसहित नेपाली सेना, नेपाल प्रहरी, सशस्त्र प्रहरी बल, स्वास्थ्य सेवा, संसद् सेवा, सामुदायिक विद्यालयका शिक्षक तथा प्रदेश र स्थानीय तहमा कार्यरत कर्मचारीको नयाँ तलबमान र सुविधा स्वीकृत गरेको हो।

नयाँ तलबमानअनुसार नेपाली सेनाका उच्च तहका अधिकृतहरूको तलबमा पनि संशोधन भएको छ। जसअनुसार प्रधानसेनापतिको मासिक तलब ९० हजार ५९४ रुपैयाँ पुगेको छ। यससँगै प्रधानसेनापतिको आधारभूत तलब ९० हजार रुपैयाँ नाघेको छ।

त्यस्तै, नेपाली सेनाका रथीको मासिक तलब ८७ हजार ८५ रुपैयाँ कायम गरिएको छ। उपरथीको तलब भने ८४ हजार ५७६ रुपैयाँ पुगेको छ।

प्रधानसेनापति, रथी र उपरथीका लागि दुई–दुई ग्रेड निर्धारण गरिएको छ। प्रधानसेनापतिको ग्रेडदर २ हजार ८३१ रुपैयाँ, रथीको २ हजार ७२१ रुपैयाँ र उपरथीको २ हजार ६४३ रुपैयाँ तोकिएको छ।

नयाँ तलबमानअनुसार सहायक रथीको मासिक तलब ७८ हजार २२० रुपैयाँ पुगेको छ। महासेनानीको तलब भने ७२ हजार ८७६ रुपैयाँ कायम गरिएको छ। यी दुवै पदमा पाँच ग्रेड निर्धारण गरिएको छ।

सहायक रथीको ग्रेडदर २ हजार २३५ रुपैयाँ रहेको छ भने महासेनानीको ग्रेडदर २ हजार ८२ रुपैयाँ कायम गरिएको छ।

त्यसैगरी, प्रमुख सेनानीको मासिक तलब ६९ हजार ९ रुपैयाँ पुगेको छ। सेनानीको तलब भने ६७ हजार ९०७ रुपैयाँ कायम गरिएको छ।

सरकारले बजेटमार्फत चालु आर्थिक वर्षका लागि कर्मचारीको तलब तथा सुविधामा संशोधन गर्ने घोषणा गरेको थियो। सोहीअनुसार अर्थ मन्त्रालयले तयार पारेको नयाँ तलबमान मन्त्रिपरिषद्बाट स्वीकृत भएपछि कार्यान्वयनमा आएको हो।

नयाँ तलबमान साउन १ गतेदेखि नै लागू हुने भएकाले सम्बन्धित कर्मचारी तथा सुरक्षा निकायका पदाधिकारीले संशोधित दरअनुसारको तलब तथा सुविधा पाउनेछन्।

सरकारको निर्णयले निजामती प्रशासनसँगै सुरक्षा निकाय, स्वास्थ्य सेवा, संसद् सेवा, सामुदायिक विद्यालय र प्रदेश तथा स्थानीय तहमा कार्यरत कर्मचारीको पारिश्रमिक संरचनालाई समेत समेटेको छ। यसले संघीय सरकारअन्तर्गतका सेवासँगै प्रदेश र स्थानीय तहमा कार्यरत कर्मचारीको तलबमानमा समेत नयाँ व्यवस्था लागू हुने भएको छ।