काठमाडौं। प्रमुख प्रतिपक्षी दलहरूले प्रतिनिधिसभा बैठकमा प्रधानमन्त्री बालेन्द्र शाह ‘बालेन’ ले दिएको सीमासम्बन्धी अभिव्यक्तिलाई लिएर कडा विरोध जनाएका छन्। १७ जेठमा प्रधानमन्त्रीले राष्ट्रका नाममा सम्बोधन गर्ने क्रममा दिएको भनिएको सीमासम्बन्धी विवादास्पद अभिव्यक्ति सच्याउनुपर्ने माग गर्दै विपक्षी सांसदहरूले संसदमा आपत्ति जनाएका हुन्।

प्रतिनिधिसभाको बैठक सुरु भएलगत्तै विपक्षी दलका सांसदहरूले उक्त विषय उठाएका थिए। उनीहरूले प्रधानमन्त्रीको अभिव्यक्तिले राष्ट्रिय हित र संवेदनशील कूटनीतिक विषयमा अनावश्यक विवाद सिर्जना गरेको भन्दै सरकारको स्पष्ट धारणा सार्वजनिक गर्न माग गरेका छन्। साथै, प्रधानमन्त्रीले आफ्नो भनाइ सच्याएर संसद र जनतासामु स्पष्ट पार्नुपर्ने उनीहरूको अडान छ।

विपक्षी दलहरूको तर्फबाट बोल्दै नेपाली कांग्रेसका सांसद चन्द्रमोहन यादवले सीमाजस्तो संवेदनशील विषयमा प्रधानमन्त्रीले जिम्मेवार ढंगले अभिव्यक्ति दिनुपर्ने बताए। उनले प्रधानमन्त्रीको भनाइले भ्रम सिर्जना गरेको दाबी गर्दै त्यसलाई तत्काल सच्याउन आग्रह गरे।

‘प्रधानमन्त्रीले बोल्नुभएको सीमासम्बन्धी अभिव्यक्ति सच्याउनुपर्छ। यसको हामीले विरोध गरिरहेका छौँ,’ यादवले संसदमा भने। उनले सरकारले यस विषयलाई सामान्य रूपमा लिन नहुने उल्लेख गर्दै राष्ट्रिय सार्वभौमिकता र कूटनीतिक सम्बन्धसँग जोडिएका विषयमा थप सावधानी अपनाउनुपर्ने धारणा राखे।

संसदमा विपक्षी दलहरूले प्रधानमन्त्रीको अभिव्यक्तिबारे सरकारको औपचारिक जवाफ पनि माग गरेका छन्। उनीहरूले प्रधानमन्त्रीले आफ्नो भनाइ फिर्ता लिन वा स्पष्ट पार्नुपर्ने अडान दोहोर्याउँदै त्यसो नभएसम्म संसदमा विरोधका कार्यक्रमलाई निरन्तरता दिन सकिने संकेत गरेका छन्।