काठमाडौं । अधिकांश नेतामाथि पद, शक्ति र सुविधाको मोह भएको आरोप लाग्ने गर्छ । तर, नेकपा एमाले बागमती प्रदेशका सांसद तथा पूर्वस्वास्थ्यमन्त्री किरण थापाले आफूलाई फरक ढंगले चिनाएका छन् ।

उनले राजनीतिलाई पेशा होइन, समाजसेवाको माध्यम बनाएका छन् । उनी स्वच्छ छवि भएका नेताका रूपमा परिचित छन् ।

यही कारण स्थानीय तहदेखि प्रदेश सरकारसम्म उनले जिम्मेवारी पाए । उनी जनतासँग प्रत्यक्ष जोडिएर काम गर्ने नेता पनि हुन् । २०७४ सालको स्थानीय तह निर्वाचनमा उनी वडाध्यक्ष भए ।

त्यसबेलै उनले घोषणा गरे- ‘वडाध्यक्षले पाउने पारिश्रमिक एक रुपैयाँ लिन्नँ ।’ नभन्दै पाँच वर्षसम्म उनले पाएको सबै पारिश्रमिक जगत भैरव प्रतिष्ठान मार्फत स्थापना गरिएको अक्षयकोषमा जम्मा गरे ।

त्यसको ब्याजवापतको रकम गरिब तथा जेहेन्दार विद्यार्थीको शिक्षामा खर्च गरे । उनी भन्छन्- ‘आर्थिक अभावका कारण कुनै पनि विद्यार्थीको पढाइ रोकिनु हुँदैन ।’

बागमतीको सांसद बनेपछि पनि उनको सामाजिक सेवाप्रतिको सोच फेरिएन । सांसदका रूपमा पाउने पारिश्रमिक पनि उनले सोही अक्षयकोषमा जम्मा गर्दै आएका छन् । ‘राजनीतिबाट व्यक्तिगत लाभ होइन, समाजलाई प्रतिफल दिनुपर्छ,’ उनको धारणा छ ।

उसो त थापा राजनीतिमा आउनुअघि नै उनी सामाजिक क्षेत्रमा सक्रिय थिए । उनीसँग लामो समय अन्तर्राष्ट्रिय मानवीय सहायता संस्था रेडक्रसमा रहेर विपद्, स्वास्थ्य र मानवीय सेवामा काम गरेको अनुभव छ ।

उनी जनप्रतिनिधि हुनुअघि भक्तपुरको सूर्यविनायक उद्योग वाणिज्य संघको अध्यक्ष बने । खानेपानी समितिलगायत विभिन्न सामाजिक संस्थामा रहेर जनताको काम गरे ।

स्थानीय विकासका धेरै अभियानमा उनी अग्रपंक्तिमा देखिए । बागमती प्रदेश सरकारमा उनले करिब दुई वर्ष स्वास्थ्य मन्त्रीको जिम्मेवारी सम्हाले । मन्त्री हुँदा उनले दुर्गम क्षेत्रलाई प्राथमिकतामा राखेका थिए । दुर्गम क्षेत्रमा स्वास्थ्य संस्थाहरू खोले ।

उनी समृद्ध बागमती प्रदेशको स्पष्ट मार्गचित्र बोकेका नेता हुन् । विकासको योजना कागजमा नभई गाउँसम्म पुग्नुपर्ने मान्यता उनको छ । जनतासँग प्रत्यक्ष भेटघाट गर्न उनी रुचाउँछन् । भेटघाटमार्फत् जनताको समस्या सुनेर समाधान खोज्ने उनको राजनीतिक शैली चर्चित छ ।

उनी प्रष्ट भन्छन्, ‘राजनीति भनेको समाजसेवा हो । राजनीतिलाई कहिल्यै पेशा बनाउनु हुँदैन ।’ उनका अनुसार राजनीति कमाउने माध्यम बनेपछि भ्रष्टाचार बढ्छ । समाजसेवाको भावना हराउँछ । जनताप्रतिको उत्तरदायित्व पनि क्रमशः कमजोर हुन्छ ।

उनले विद्यार्थीकालदेखि विशुद्ध राजनीतिमा लागेका कतिपय नेताले सत्तामा पुगेपछि आफ्नै पहिलेको प्रतिबद्धता बिर्सिँदै भ्रष्टाचार गर्दा लोकतान्त्रिक गणतन्त्रमाथि नै प्रश्न उठाउने तहमा जनता पुगेको बताए ।

उनी भन्छन्, ‘राजनीतिक संघर्षमा रहेको बेला बोलेका कुरा सत्तामा पुगेपछि कार्यान्वयन नगर्दा राजनीति मात्रै होइन, व्यवस्था नै बदनाम बनाउने प्रयास भयो ।’ त्यसैले राजनीतिमा नैतिकता, इमानदारी र सेवाभाव आवश्यक रहेको उनी दोहोर्‍याउँछन् ।

यद्यपि, थापाको स्वच्छ राजनीतिक छविलाई हिलो छ्यापेर फोहोर पार्न खोज्नेहरू पनि नभएका भने होइनन् । हालै पार्टी अध्यक्ष केपी शर्मा ओलीका लागि ‘ओली कुटी’ निर्माणमा आर्थिक सहयोग गरेको समाचार सार्वजनिक भयो ।

थापाले भने, ‘त्यो पूरापूर भ्रामक र झुटा समाचार हो । त्यसमा कुनै सत्यता छैन ।’ सांसद थापा आगामी दिनमा पनि समाजसेवामार्फत राजनीति गर्ने आफ्नो प्रतिबद्धतामा उनी अडिग रहेको बताउँछन् ।

उनका लागि राजनीति सत्ता प्राप्त गर्ने बाटोभन्दा पनि समाज परिवर्तन गर्ने अभियान हो ।