काठमाडौँ । प्रमुख प्रतिपक्षी दल नेकपा (एमाले) ले प्रधानमन्त्री बालेन्द्र शाहको राष्ट्रका नाममा हुने सम्बोधन सरकारी सञ्चारमाध्यमभन्दा निजी फेसबुक पेज र मनिटाइजेसनमा केन्द्रित भएको आरोप लगाएको छ।

सोमबार बसेको प्रतिनिधिसभा बैठकमा एमाले सचेतक निता घतानीले प्रविधिको प्रयोग सकारात्मक भए पनि राज्यका आधिकारिक निकायलाई बाइपास गरेर फेसबुकको भ्युज बढाउनेतर्फ प्रधानमन्त्री केन्द्रित हुनु दुःखद भएको बताइन्।

सांसद घतानीले प्रधानमन्त्री शाहले संसद्को रोस्टमबाटै नेपालले पनि भारतको सीमा मिचेको आशयको अभिव्यक्ति दिएको भन्दै त्यसको प्रतिवाद गरिन्। उनले प्रधानमन्त्रीले कुन तथ्य, प्रमाण र कूटनीतिक आधारमा यस्तो संवेदनशील विषयमा अभिव्यक्ति दिएको हो भन्ने स्पष्ट पार्नुपर्ने माग गरिन्।

‘सत्ता र सरकार अस्थायी हुन्, तर भूगोल र सार्वभौमसत्ता स्थायी हुन्छ,’ उनले भनिन्, ‘आफ्नो देशको अस्मितामाथि प्रश्न उठाउने अभिव्यक्ति तत्काल संसद्को रेकर्डबाट हटाइनुपर्छ र प्रधानमन्त्रीले यसमा माफी माग्नुपर्छ।’

सरकार देशका विभिन्न वर्ग र समुदायले भोगिरहेका समस्याप्रति बेखबर रहेको आरोप पनि घतानीले लगाइन्। उनका अनुसार सहकारी पीडितहरू आफ्नो बचत फिर्ताको पर्खाइमा छन् भने सुकुम्वासीहरू बासको चिन्तामा छन्। तर, सरकारले उनीहरूका समस्या समाधान गर्न ठोस पहल गर्न नसकेको उनको भनाइ थियो।

किसानले समयमा मल नपाएको र उत्पादनको उचित मूल्यसमेत नपाएको उनले बताइन्। गरिब तथा विपन्न नागरिकले उपचार नपाएर अकालमा ज्यान गुमाइरहेको अवस्थामा बन्द भएको स्वास्थ्य बीमा कार्यक्रमलाई प्रभावकारी बनाउन पनि सरकार असफल भएको उनको आरोप थियो।

बजारमा ग्यासको अभाव र महँगी बढ्दै गएको उल्लेख गर्दै उनले प्रश्न गरिन्, ‘बजारमा ग्यास छैन, तर सरकार कहाँ छ?’

राहदानी, सवारीचालक अनुमतिपत्र तथा अस्पतालमा सेवा लिन नागरिकले अझै पनि लामो लाइनमा बस्नुपर्ने अवस्था रहेको भन्दै उनले सरकारको ‘अनलाइन’ सेवा प्रवाहमाथि समेत प्रश्न उठाइन्।

पछिल्लो समय सिंहदरबारको नाम परिवर्तन गर्नुपर्ने विषयमा भइरहेको बहसबारे पनि सांसद घतानीले टिप्पणी गरेकी थिइन्।