काठमाडौं । नेपाली कांग्रेसका निवर्तमान सभापति शेरबहादुर देउवा स्वास्थ्य उपचार सकेर आज नेपाल फर्किँदै छन्। देउवालाई स्वागत गर्न कांग्रेसको संस्थापन इतर समूहका नेताहरू त्रिभुवन अन्तर्राष्ट्रिय विमानस्थल पुग्ने भएका छन्।

राष्ट्रिय भेला तयारी समितिका संयोजक डा. शशांक कोइरालाको नेतृत्वमा नेताहरू विमानस्थल पुग्ने कांग्रेस नेता मीन विश्वकर्माले जानकारी दिए। उनका अनुसार देउवा थाई एयरको विमानबाट आज दिउँसो १२ बजे काठमाडौं अवतरण गर्नेछन्।

देउवालाई स्वागत गर्न निवर्तमान कार्यवाहक सभापति पूर्णबहादुर खड्का, नेता डा. शेखर कोइरालासहित पूर्वपदाधिकारी तथा केन्द्रीय सदस्यहरू सहभागी भएका छन्।

देउवा स्वास्थ्य उपचारका लागि गत फागुनमा सिंगापुर गएका थिए। त्यहाँ उपचारपछि थप उपचारका लागि हङकङ पुगेका उनी त्यसपछि थाइल्याण्ड गएका थिए।

नेपाल फर्किएलगत्तै देउवा कांग्रेसको आन्तरिक गतिविधिमा सक्रिय हुने बताइएको छ। साउन २९ देखि ३१ गतेसम्म काठमाडौंमा आयोजना हुने संस्थापन इतर समूहको राष्ट्रिय भेलालाई पनि उनले सम्बोधन गर्ने कार्यक्रम रहेको विश्वकर्माले बताए।

तस्वीरहरू: