काठमाडौं। साढे पाँच महिनापछि स्वदेश फर्किएका नेपाली कांग्रेसका पूर्वसभापति एवं पूर्वप्रधानमन्त्री शेरबहादुर देउवालाई स्वागत गर्न त्रिभुवन अन्तर्राष्ट्रिय विमानस्थलमा नेता तथा समर्थकको बाक्लो उपस्थिति देखिएको छ।

देउवालाई स्वागत गर्न कांग्रेसको संस्थापन इतर समूहका प्रभावशाली नेताहरूसँगै सभापति गगन थापा पक्षका केही नेतासमेत विमानस्थल पुगेका छन्।

विशेष महाधिवेशनमा थापा पक्षमा खुलेका बागमती प्रदेशका मुख्यमन्त्री इन्द्र बानियाँ तथा थापाले केन्द्रीय सदस्यमा मनोनीत गरेका अजयकुमार चौरसिया पनि देउवाको स्वागतमा पुगेका थिए।

यद्यपि, थापा पक्षका अन्य प्रभावशाली नेताहरू भने विमानस्थलमा देखिएनन्।

देउवा गत फागुन १३ गते पत्नी आरजु राणासहित उपचारका लागि सिंगापुर गएका थिए। सिंगापुर र हङकङमा उपचार गराएका उनी थाइल्याण्ड हुँदै बिहीबार नेपाल फर्किएका हुन्। फर्किँदा भने देउवा एक्लै थिए।

कांग्रेसको आधिकारिकतासम्बन्धी विवादमा सर्वोच्च अदालतमा पुनः सुनुवाइ हुने भएपछि देउवाको स्वदेश फिर्तीलाई राजनीतिक रूपमा समेत अर्थपूर्ण रूपमा हेरिएको छ।