काठमाडौं। नेपाली कांग्रेसका निवर्तमान सभापति शेरबहादुर देउवाले आफूलाई राजनीतिक तथा कानुनी रूपमा कमजोर बनाउने प्रयास विगतमा पनि भएको दाबी गर्दै तत्कालीन राजा ज्ञानेन्द्र शाहले समेत आफूलाई रोक्न नसकेको बताएका छन्।

बिहीबार स्वदेश फर्किएपछि कांग्रेसको संस्थापन इतर पक्षको चुनदेवीस्थित सम्पर्क कार्यालयमा नेता–कार्यकर्ता तथा शुभेच्छुकलाई सम्बोधन गर्दै देउवाले आफू र पत्नी आरजु राणा देउवाविरुद्ध पटक-पटक मुद्दा चलाउने प्रयास भएको बताए।

आफूविरुद्ध अन्तर्राष्ट्रिय तहमा समेत मुद्दा लगाउने प्रयास भएको दाबी गर्दै देउवाले नेपालका अदालतबाट आफू र आरजुलाई पक्राउ नगर्न आदेश आएको बताए। सम्पत्ति शुद्धीकरणसम्बन्धी निकायबाट समेत पटक–पटक अनुसन्धान भएको तर आफूविरुद्ध केही प्रमाण नपाइएको उनको भनाइ थियो।

देउवाले देशमा जनता र अदालत रहेकाले सबै घटनाबारे उनीहरू जानकार रहेको बताए। आफूले धेरै कुरा गर्न नचाहेको उल्लेख गर्दै उनले भने, ‘राजा ज्ञानेन्द्रले त सकेनन्, अरूले सक्छ यहाँ?’

देउवाले आफूविरुद्ध भएका गतिविधिको राजनीतिक प्रतिवाद गर्ने संकेतसमेत गरेका छन्। उनले आगामी दिनमा आफूहरू त्यसको जवाफ दिने बताएका छन्।

भिडियो: