काठमाडौं। चीनले स्थानीय आवश्यकता, प्राकृतिक स्रोत र औद्योगिक क्षमताअनुसार कृत्रिम बौद्धिकता (एआई) उद्योग विस्तार गर्दै राष्ट्रियस्तरमा एआई पूर्वाधार निर्माणलाई तीव्र बनाएको छ।

चीनका ३१ प्रान्तीयस्तरीय क्षेत्रबाट प्राप्त आर्थिक तथ्याङ्कले एआई उद्योग देशभर एउटै ढाँचामा नभई सम्बन्धित क्षेत्रको विशेषता र स्रोतअनुसार फरक-फरक रूपमा अघि बढिरहेको देखाएको छ। एआईमा आधारित उत्पादन तथा सेवाको मागसमेत बढिरहेको छ।

राष्ट्रिय विकास तथा सुधार आयोगअन्तर्गतको स्टेट इन्फर्मेसन सेन्टरका अनुसन्धानकर्ता सियाओ होङवेईका अनुसार चीनमा एआई अब केवल प्रविधिको अवधारणामा सीमित नभई उत्पादनशीलता बढाउने माध्यमका रूपमा विकसित हुँदै गएको छ। एकीकृत सर्किट, औद्योगिक रोबोटलगायतका क्षेत्रमा एआईको प्रयोग विस्तार भइरहेको उनले बताए।

उद्योग तथा सूचना प्रविधि मन्त्रालयका अनुसार यस वर्ष जुनसम्म चीनको बुद्धिमान कम्प्युटिङ क्षमता वार्षिक १७७ प्रतिशतले वृद्धि भएर २ हजार १८५ इफलोप्स पुगेको छ। देशभर रहेका कम्प्युटिङ सुविधाको औसत उपयोग दर ७१.४ प्रतिशत रहेको छ।

बेइजिङ, साङ्घाई र ग्वाङडोङ एआई उद्योगका प्रमुख केन्द्रका रूपमा अघि आएका छन्। प्रविधि, दक्ष जनशक्ति र औद्योगिक पूर्वाधारको उपलब्धताका कारण यी क्षेत्रले एआईको पूर्ण औद्योगिक शृङ्खला विकास गरिरहेका छन्।

बेइजिङले आफूलाई विश्वस्तरीय एआई नवप्रवर्तन केन्द्र बनाउने लक्ष्य लिएको छ। जुलाई २३ सम्म त्यहाँ २५९ वटा लार्ज मोडल र १९५ वटा एआई उत्पादन दर्ता भएका थिए।

साङ्घाईमा जुनसम्म १६९ वटा एआई लार्ज मोडल दर्ता तथा स्वीकृत भएका थिए। त्यहाँका ३९४ ठूला एआई कम्पनीले सन् २०२५ मा ६३७ अर्ब युआनभन्दा बढीको औद्योगिक उत्पादन गरेका थिए। ग्वाङडोङमा पनि मुख्य एआई उद्योगको आकार गत वर्ष ३०० अर्ब युआनभन्दा माथि पुगेको थियो।

चीनका अन्य प्रान्तले पनि आफ्नो विशेष क्षमता उपयोग गर्दै एआईका अलग-अलग क्षेत्रमा लगानी बढाएका छन्।

आन्हुईले एआई चिप उद्योगलाई प्राथमिकता दिएको छ। हुबेईले अप्टोइलेक्ट्रोनिक्समा रहेको क्षमता प्रयोग गर्दै अप्टिकल सञ्चार, चिप, डिस्प्ले र नेटवर्कसम्बन्धी उद्योग विस्तार गरिरहेको छ।

हेनानले आफ्नो यातायात केन्द्रको पहिचानलाई कम्प्युटिङ हबका रूपमा विकास गरिरहेको छ। यता सिन्जियाङ, भित्री मङ्गोलिया र गुइझोउले स्वच्छ ऊर्जाको उपलब्धतालाई उपयोग गर्दै बुद्धिमान कम्प्युटिङ केन्द्र विस्तार गरिरहेका छन्।

हुबेईको लिचुआनमा भने प्राकृतिक वातावरणलाई नै एआई पूर्वाधारको आधार बनाइएको छ। चिसो हावापानी र पर्याप्त जलविद्युत् उपलब्धताका कारण त्यहाँ कम्प्युटिङ केन्द्र सञ्चालनको लागत तुलनात्मक रूपमा कम हुने बताइएको छ।

लिचुआन एआई कम्प्युटिङ सेन्टरले करिब १५० पेटाफ्लप्स क्षमता प्रदान गर्दै आएको छ। यसको उपयोग दर ८० प्रतिशतभन्दा माथि रहेको छ। केन्द्रबाट संस्कृति तथा पर्यटन, सरकारी सेवा र एयरोस्पेस क्षेत्रलाई सेवा दिइँदै आएको छ।

स्थानीय पर्यटनबाट उत्पन्न हुने ठूलो परिमाणको तथ्याङ्कलाई समेत एआई सेवामा प्रयोग गर्न थालिएको छ। लिचुआनमा वार्षिक दुई करोडभन्दा बढी पर्यटक आउने भएकाले उनीहरूको यात्रा, बसोबास, खानपान र मनोरञ्जनसँग सम्बन्धित तथ्याङ्कका आधारमा स्मार्ट गाइडलगायतका एआई सेवा विकास गरिएको छ।

चीनको उद्योग तथा सूचना प्रविधि मन्त्रालयले आगामी दिनमा उच्च गुणस्तरको कम्प्युटिङ पूर्वाधार विस्तारसँगै राष्ट्रियस्तरमा यसको अनुगमन प्रणाली विकास गर्ने योजना अघि बढाएको छ।

हब, क्षेत्रीय र एज कम्प्युटिङ केन्द्रबीच समन्वय बढाउँदै देशव्यापी एआई पूर्वाधारलाई थप व्यवस्थित बनाउने तयारी भइरहेको छ।