काठमाडौं । सङ्घीय संसद् अन्तर्गत प्रतिनिधिसभामा विचाराधीन दुई महत्वपूर्ण विधेयकमा उल्लेख्य सङ्ख्यामा संशोधन प्रस्ताव दर्ता भएका छन् ।

प्रतिनिधिसभामा अगाडि बढेको ‘खानी तथा खनिज पदार्थ विधेयक’मा ३५ वटा र ‘राहदानी (पहिलो संशोधन) विधेयक, २०८३’मा १७ वटा संशोधन प्रस्ताव दर्ता भएका छन् ।

संसद् सचिवालयका अनुसार दर्ता भएका संशोधन प्रस्तावहरू एकल र समूहगत रूपमा आएका छन् । अहिले ती प्रस्तावलाई छुट्याएर एकीकृत गर्ने काम भइरहेको छ ।

सङ्घीय संसद् सचिवालयको विधेयक शाखा (प्रतिनिधिसभा)का शाखा अधिकृत जयराम खड्काका अनुसार संशोधन प्रस्तावहरूलाई प्रक्रियागत रूपमा अघि बढाउन केही समय लाग्नेछ ।

‘हामी अहिले एकल वा समूहगत रूपमा प्राप्त भएका प्रस्तावहरूलाई एकीकृत गर्दैछौँ । यो प्रक्रिया पूरा भएपछि मात्रै छलफलका लागि अगाडि बढ्छ,’ खड्काले बताए ।

संसदीय प्रक्रियाअनुसार संशोधन प्रस्तावहरू एकीकृत गरेपछि सम्बन्धित समितिमा छलफल तथा आवश्यक प्रक्रियाबाट विधेयक अघि बढ्नेछन् ।

दुवै विधेयकमा ठूलो सङ्ख्यामा संशोधन प्रस्ताव पर्नुले विधेयकका प्रावधानमाथि सांसदहरूको चासो र फरक दृष्टिकोण रहेको देखाएको छ । अब ती संशोधन प्रस्तावमध्ये कुन स्वीकार हुने र कुन अस्वीकार हुने भन्ने विषय सम्बन्धित संसदीय प्रक्रियाबाट टुंगो लाग्नेछ ।

विशेषगरी खानी तथा खनिज पदार्थसम्बन्धी कानुनी व्यवस्था र राहदानीसम्बन्धी विद्यमान प्रावधान संशोधन गर्न ल्याइएका विधेयकमा सांसदहरूले प्रस्ताव गरेका संशोधनले विधेयकको अन्तिम स्वरूपमा समेत प्रभाव पार्न सक्नेछ ।

संसद् सचिवालयले संशोधन प्रस्ताव एकीकृत गर्ने काम पूरा गरेपछि मात्रै दुवै विधेयकमा औपचारिक छलफल अघि बढ्ने जनाएको छ ।