काठमाडौं। नेपाली कांग्रेसका सभापति गगन थापाले सुरुङमा फसेकाहरूको उद्धारमा भएको ढिलाइलाई ढाकछोप गर्न खोज्दा सरकार थप गल्तीको सिकार नबनोस् भन्दै सचेत गराएका छन्।

सुरुङमा फसेकाहरूका परिवारका सदस्यले आफूलाई लगातार फोन गरिरहेको भन्दै थापाले अहिले सरकारको पहिलो प्राथमिकता जसरी हुन्छ जीवन बचाउने प्रयास हुनुपर्ने बताए।

उनले भने, ‘बाहिरको सहयोग लिनुपर्छ भनेर हामीले समयमै भनेका थियौँ। तर, समयमा सहयोग माग्ने काम भएन, चुक्ने कुरा भइसक्यो। अब फेरि गल्तीलाई ढाकछोप गर्ने होइन, जे गर्न सकिन्छ सबैभन्दा राम्रो प्रयास गर्नुपर्छ। एउटा गल्ती ढाक्न अर्को गल्ती नगर्नुहोला। एउटा मात्र जीवन बचाउन सकियो भने पनि त्यो धेरै ठूलो कुरा हुन्छ।’

थापाले बाढीपहिरोमा ज्यान गुमाएकाहरूको शव व्यवस्थापनमा समेत राज्य गम्भीर र संवेदनशील हुनुपर्ने बताए। आफन्तको सास भेटिने आशा कमजोर भए पनि कम्तीमा शव भेटियोस् भनेर परिवारले खोजी गरिरहेको उल्लेख गर्दै उनले उनीहरूको पीडालाई राज्यले प्राथमिकतामा राख्नुपर्ने धारणा राखे।

प्रभावित क्षेत्रमा पुग्दा स्थानीय जनप्रतिनिधिले गरेको काम प्रशंसनीय देखिएको पनि थापाले बताए। खोजी तथा उद्धारदेखि राहत र पुनर्निर्माणसम्मका काममा प्रदेश र संघीय सरकारबीच प्रभावकारी समन्वय आवश्यक रहेको उनको भनाइ छ।

राहतका नाममा सामग्री थुपार्नेभन्दा आवश्यकताअनुसार व्यवस्थापन गर्नुपर्नेमा पनि उनले जोड दिए। उनका अनुसार सहयोग गर्न चाहनेको संख्या ठूलो भए पनि प्रभावित क्षेत्रमा के चाहिएको छ र के पठाइँदैछ भन्नेबीच तालमेल मिलाउन आवश्यक छ।

‘सहयोग गर्न सक्नेहरूले सहयोग गरौँ। सकिँदैन भने पनि पीडितलाई थप चोट पुग्ने गरी कटु वचन नबोलौँ,’ थापाले भने, ‘तल फिल्डको अवस्था बाहिरबाट सोचेभन्दा निकै भयावह छ।’

थापाले बाढीपहिरोपछि पार्टीको तर्फबाट भएका स्थलगत अध्ययन र प्राप्त विवरणलाई समेटेर छिट्टै विस्तृत प्रतिवेदन सार्वजनिक गर्ने बताए। उक्त प्रतिवेदन सरकारलाई समेत बुझाइने उनको भनाइ छ।