काठमाडौं। आगामी शुक्रबारदेखि प्रदर्शनमा आउने फिल्म ‘अक्षरा’को ट्रेलर सार्वजनिक गरिएको छ। राजधानीमा आयोजित कार्यक्रममा ३ मिनेट २४ सेकेन्ड लामो ट्रेलर सार्वजनिक गरिएको हो।

फिल्मको ट्रेलरले छोरीको इच्छाविपरीत परिवारले खान्दानी परिवारको युवकसँग विवाह गरिदिएपछि उत्पन्न हुने पारिवारिक द्वन्द्व र त्यसको सामाजिक प्रभावलाई कथाको केन्द्रमा राखेको छ। जीवनसाथी रोज्ने अधिकार, पारिवारिक दबाब र जबर्जस्ती विवाहले निम्त्याउने समस्यालाई ट्रेलरमा प्रस्तुत गरिएको छ।

यसैबीच, निर्माण पक्षले फिल्मबाट प्राप्त हुने आफ्नो हिस्साको १० प्रतिशत रकम प्रधानमन्त्री दैवीप्रकोप उद्धार कोषमा जम्मा गर्ने घोषणा गरेको छ।

विनयराज पौडेलको निर्देशनमा बनेको फिल्ममा सुशील सिटौला र न्यान्सी खड्का मुख्य भूमिकामा छन्। फिल्ममा सुशील पोखरेल, अंशु महर्जन, पुष्कर राउत, रिस्ता अधिकारी, उत्तम केसी, गीता अधिकारी, वीरेन्द्र कुशवाहलगायत कलाकारको अभिनय छ।

क्षित बाबु प्रोडक्सन हाउसको ब्यानरमा बनेको फिल्ममा सोनी थापा ढुंगाना प्रस्तुतकर्ता तथा उग्रसेन ढुंगाना र सुग्रसेन ढुंगाना निर्माता छन्। फिल्मको वितरण नेसनल सिने ग्रुप नेपालका तर्फबाट दीपक दंगालले गर्दैछन्।

कृष्ण अष्टमीको अवसरमा ‘अक्षरा’ टिमले काठमाडौंको बौद्धमा रथयात्रासमेत निकालेको थियो। रथयात्रामा मुख्य कलाकार सुशील सिटौला, पुष्कर राउत र निर्देशक पौडेललगायत सहभागी थिए।