काठमाडौं। जबरजस्ती करणी मुद्दामा सजाय भुक्तान गरिरहेका र कारागारबाट फरार रहेका एक कैदीलाई रुकुम (पश्चिम) प्रहरीले पक्राउ गरेको छ।

जिल्ला प्रहरी कार्यालय रुकुम (पश्चिम), मुसिकोट खलंगाका अनुसार बाँफिकोट गाउँपालिका–२ जिपु बस्ने २६ वर्षीय दुर्गालाल परियार (दुर्गालाल दमाईं) पक्राउ परेका हुन्।

रुकुम जिल्ला अदालत मुसिकोटको २०८१ माघ ६ गतेको फैसलाले जबरजस्ती करणी मुद्दामा १२ वर्ष कैद, पाँच लाख रुपैयाँ जरिवाना र ५० हजार रुपैयाँ क्षतिपूर्ति तोकिएका परियार कारागार कार्यालय रुकुम (पश्चिम भाग) मा कैद भुक्तान गरिरहेका थिए।

तर, २०८२ भदौ २४ गते रास्वपा सभापति रवि लामिछानेसँगै जेन–जी आन्दोलनका क्रममा कारागारको गेट तोडी उनी फरार भएका थिए।

प्रहरी टोलीले खोजतलास गर्ने क्रममा बिहीबार राति अन्दाजी २१ः०० बजे निजकै घरवतनमा लुकिछिपी बसिरहेको अवस्थामा उनलाई नियन्त्रणमा लिएको हो।

पक्राउ परेका परियारलाई जिल्ला प्रहरी कार्यालयको हिरासतमा राखिएको छ भने आवश्यक कारबाहीका लागि रुकुम जिल्ला अदालत मुसिकोटमा उपस्थित गराइने सूचना अधिकारी प्रहरी निरीक्षक हेमन्त गिरीले जानकारी दिएका छन्।