काठमाडौं । पाकिस्तान र अफगानिस्तानबीचको सीमा क्षेत्रमा फेरि तनाव बढेको छ। पाकिस्तानी अधिकारीहरूले अफगानिस्तानबाट सीमा चौकीमा रातभर मोर्टार र अन्य भारी हतियारबाट गोलाबारी भएको दाबी गरेका छन्।

अफगान पक्षले भने आफ्ना सुरक्षाकर्मीले कुनै आक्रमण नगरेको जनाएको छ।

पाकिस्तानी अधिकारीहरूका अनुसार अफगानिस्तानबाट सीमापार घुसपैठको प्रयास गरिरहेका लडाकुलाई पाकिस्तानी सेनाले रोकेपछि अफगान तालिबानका सुरक्षाकर्मीले सीमा चौकीलाई लक्षित गरी गोलाबारी गरेका थिए।

जवाफी कारबाहीमा पाकिस्तानी सेनाले अफगानिस्तानतर्फ रहेका तालिबानका सीमा चौकी, मोर्टार प्रहार गर्ने स्थान र अन्य सुरक्षा संरचनालाई तोपखानाबाट निशाना बनाएको दाबी गरिएको छ।

पाकिस्तानी अधिकारीहरूका अनुसार पक्तिया र नङ्गरहार प्रान्ततर्फबाट केही लडाकु पाकिस्तान प्रवेश गर्ने प्रयासमा थिए। पाकिस्तानले पाकिस्तानी तालिबानसँग सम्बन्धित लडाकुलाई ‘फितना–उल–खवारीज’ भन्ने गरेको छ।

पाकिस्तानले लामो समयदेखि अफगानिस्तानको भूमिबाट आफ्नो देशविरुद्ध आतङ्कवादी गतिविधि भइरहेको आरोप लगाउँदै आएको छ। अफगान तालिबानले भने यस्तो आरोप अस्वीकार गर्दै आएको छ।

पाकिस्तानी अधिकारीहरूले पछिल्लो जवाफी कारबाहीपछि अफगान तालिबानका केही सुरक्षाकर्मीले सीमा क्षेत्र छाडेको र केही हताहत भएको दाबी गरेका छन्। उनीहरूले नाम सार्वजनिक नगर्ने सर्तमा घटनाबारे जानकारी दिएका हुन्।

यी दाबीहरूको स्वतन्त्र पुष्टि भने हुन सकेको छैन।

यसअघि पाकिस्तानले पूर्वी अफगानिस्तानमा लडाकुका आश्रयस्थललाई लक्षित गरी हवाई आक्रमण गरेको थियो। पाकिस्तानको सूचना मन्त्रालयले उक्त कारबाहीमा २८ जना लडाकु मारिएको दाबी गरेको थियो। अफगान अधिकारीहरूले भने आक्रमणमा कम्तीमा तीन सर्वसाधारणको मृत्यु भएको र चार जना घाइते भएको बताएका थिए।

अफगानिस्तानस्थित संयुक्त राष्ट्रसङ्घीय मिसनले समेत नागरिक हताहती भएको जनाएको थियो।

सीमा क्षेत्रमा बढेको तनावले पाकिस्तान र अफगानिस्तानबीच स्थायी शान्तिका लागि भइरहेका मध्यस्थता प्रयासमा असर पर्न सक्ने चिन्ता बढेको छ। चीन, टर्की, कतार र साउदी अरेबियाले दुवै पक्षबीच संवाद अघि बढाउन पहल गरिरहेका छन्।

संयुक्त राष्ट्रसङ्घको महासभाका क्रममा न्युयोर्कमा आयोजित कार्यक्रममा पाकिस्तानी विदेशमन्त्री इशाक दारले अफगानिस्तानमा पाकिस्तानविरोधी दुई दर्जनभन्दा बढी आतङ्कवादी समूह सक्रिय रहेको दाबी गर्दै चिन्ता व्यक्त गरेका थिए।

यसैबीच पाकिस्तानी अधिकारीहरूले उत्तरपश्चिमी पाकिस्तानको कोहाटतर्फ प्रवेश गर्न खोजेका भनिएका दुई ड्रोन निष्क्रिय पारेको बताएका छन्। उनीहरूका अनुसार यसले सीमापारबाट हुनसक्ने हवाई खतराविरुद्ध सुरक्षा बललाई थप सतर्क बनाएको छ।

पछिल्ला घटनाक्रमले केही सातादेखि तुलनात्मक रूपमा शान्त रहेको सीमा क्षेत्रमा पुनः तनाव बढाएको छ।

यसै महिनाको सुरुआतमा पाकिस्तानी सुरक्षा बलले अफगानिस्तानबाट प्रवेश गर्न खोजिरहेका १५ जना लडाकु मारिएको जनाएको थियो।

त्यसको केही समयपछि खैबर पख्तुनख्वाको हङ्गु जिल्लामा लडाकुसँग भएको भिडन्तमा छ जना पाकिस्तानी सुरक्षाकर्मी मारिएका थिए। त्यस घटनापछि पाकिस्तानले अफगानिस्तानमा हवाई कारबाही गरेको जनाएको थियो।

त्यसअघि कोहाट सहरमा रहेको प्रहरी परिसरभित्रको मस्जिदमा आत्मघाती विस्फोट भएको थियो। विस्फोटपछि आठ जना बन्दुकधारीले प्रहरी परिसरमा आक्रमण गरेका थिए। करिब २० घण्टा चलेको भिडन्तमा कम्तीमा २१ जनाको मृत्यु भएको थियो। मृतकमध्ये अधिकांश प्रहरी अधिकारी थिए।

उक्त आक्रमणको जिम्मेवारी भने कुनै समूहले लिएको छैन।

पाकिस्तानी अधिकारीहरूले पछिल्ला हिंसात्मक घटनामा तेहरीक–ए–तालिबान पाकिस्तान (टीटीपी) र त्यससँग सम्बन्धित समूहलाई जिम्मेवार ठहराउँदै आएका छन्।

अफगान तालिबान सन् २०२१ मा सत्तामा फर्किएपछि टीटीपीले पाकिस्तानी सुरक्षा बलमाथि आक्रमण बढाएको पाकिस्तानको दाबी छ।

अफगान पक्षले भने टीटीपीलाई आफ्नो भूमिबाट पाकिस्तानविरुद्ध गतिविधि गर्न दिएको आरोप अस्वीकार गर्दै आएको छ।