काठमाडौं । आगामी शुक्रबारदेखि आइतबारसम्म देशका विभिन्न भूभागमा भारी वर्षा हुने सम्भावना देखिएपछि प्रधानमन्त्री वलेन्द्र शाह (बालेन)ले नागरिक र विपद् व्यवस्थापनसँग सम्बन्धित सबै निकायलाई उच्च सतर्कता अपनाउन आग्रह गरेका छन्।

मौसम विज्ञान विभागको पूर्वानुमान उद्धृत गर्दै प्रधानमन्त्री शाहले बुधबार सामाजिक सञ्जालमार्फत यस्तो आग्रह गरेका हुन्। उनका अनुसार असोज ९ देखि ११ गतेसम्म देशका अधिकांश भूभागमा मौसम प्रतिकूल रहनेछ।

गण्डकी र लुम्बिनी प्रदेशका केही स्थानमा भारीदेखि अति भारी वर्षा हुने सम्भावना छ। एक-दुई स्थानमा भीषण वर्षासमेत हुन सक्ने पूर्वानुमान गरिएको छ।

कोशी, बागमती, मधेश, कर्णाली र सुदूरपश्चिम प्रदेशका केही स्थानमा पनि भारीदेखि धेरै भारी वर्षा हुन सक्ने जनाइएको छ।

प्रधानमन्त्री शाहले लगातारको वर्षाले बाढी, पहिरो र गेग्रान बहावको जोखिम बढाउन सक्ने बताएका छन्। सडक तथा हवाई यातायातसमेत प्रभावित हुनसक्ने भएकाले आवश्यक सावधानी अपनाउन उनले आग्रह गरेका छन्।

विशेषगरी वर्षा भइरहेको समय र रातमा राजमार्गको यात्रा नगर्न उनले नागरिकलाई सुझाव दिएका छन्। पहिरो तथा बाढीको जोखिम भएका क्षेत्र र नदी तथा खोला किनारमा बसोबास गर्नेहरूलाई थप सतर्क रहन भनिएको छ।

ट्रेकिङ तथा हिमाली क्षेत्रमा जाने तयारीमा रहेकाहरूलाई पनि मौसममा सुधार नआएसम्म यात्रा स्थगित वा पुनर्विचार गर्न प्रधानमन्त्रीले आग्रह गरेका छन्।

उनले मौसम विज्ञान विभाग र स्थानीय प्रशासनबाट जारी हुने पूर्वसूचना नियमित रूपमा हेर्न तथा सम्बन्धित निकायका निर्देशन पालना गर्न पनि अनुरोध गरेका छन्।

सम्भावित विपद्को जोखिम न्यूनीकरणका लागि सरकारी तथा सुरक्षा निकायलाई आवश्यक पूर्वतयारी र समन्वय गर्न निर्देशन दिइएको प्रधानमन्त्री शाहले बताएका छन्।

बाढी, पहिरो तथा अन्य विपद् आइपरे तत्काल उद्धार र राहत परिचालन गर्न सक्ने गरी पूर्वसतर्कता अपनाउन पनि उनले सम्बन्धित निकायलाई आग्रह गरेका छन्।

प्रधानमन्त्री शाह अहिले संयुक्त राष्ट्रसंघको महासभामा सहभागी हुन विदेशमा छन्। विदेश यात्राकै क्रममा उनले सामाजिक सञ्जालमार्फत नेपालमा सम्भावित भारी वर्षाबारे नागरिकलाई सचेत गराएका हुन्।