काठमाडौं । राष्ट्रिय स्वतन्त्र पार्टीका महामन्त्री विपिनकुमार आचार्यले कर्मचारीको सरुवा–बढुवालाई विधि र मापदण्डमा आधारित बनाउन स्वायत्त सरुवा बोर्ड गठन गर्न सरकारसँग माग गरेका छन्।

प्रतिनिधिसभाको बैठकमा बोल्दै आचार्यले आफू राजनीतिमा आएपछि सबैभन्दा बढी दबाब खेप्नुपरेको विषयमध्ये कर्मचारीको सरुवा–बढुवा पनि रहेको बताए।

उनका अनुसार सुशासन र पारदर्शिताको कुरा गर्ने आफन्त, साथीभाइ तथा चिनजानका व्यक्तिसमेत सरुवा–बढुवाका लागि आग्रह गर्दै आउने गरेका छन्।

‘राजनीतिमा आएपछि मैले भोग्ने एउटा ठूलो प्रेसर भनेको सरुवा–बढुवाको हो,’ उनले भने, ‘सुशासन र पारदर्शिताका कुरा गर्ने साथीभाइ र इष्टमित्रहरू नै नातावाद र कृपावाद खोज्दै सरुवा–बढुवाका लागि आइपुग्नुहुन्छ।’

कतिपयले आफ्नो सिफारिसअनुसार सरुवा गराउन नसके राजनीतिक हैसियतमाथि नै प्रश्न उठाउने गरेको उनले बताए।

आचार्यले आफूले भने सबैलाई कर्मचारीको सरुवा–बढुवा निश्चित विधि र प्रक्रियाअनुसार हुने बताउँदै आएको उल्लेख गरे।

आचार्यले आफूले सरुवा-बढुवामा भनसुन नचल्ने बताउने गरेको भए पनि त्यसका लागि संस्थागत व्यवस्था आवश्यक रहेको बताए।

सरकारले आफ्नै वाचापत्रमा उल्लेख गरेको प्रतिबद्धताअनुसार स्वायत्त सरुवा बोर्ड गठन गरेर पूर्वानुमानयोग्य र विधिमा आधारित सरुवा प्रणाली लागू गर्नुपर्ने उनको भनाइ छ।

‘अब भनसुन चल्दैन भनेर भनेको छु। हाम्रो वाचापत्रको आठ नम्बरको वाचा देखाउँदै सरकारले चाँडै नै स्वायत्त सरुवा बोर्डमार्फत पूर्वानुमानयोग्य, विधिमा आधारित सरुवा प्रणाली लागू गर्दैछ भनेर पनि भन्छु,’ उनले भने।

सरुवा–बढुवामा राजनीतिक दबाब र व्यक्तिगत सिफारिस अन्त्य गर्न यस्तो बोर्ड तत्काल गठन गर्नुपर्ने उनले बताए।

आचार्यले कर्मचारी सरुवाका लागि आफूलाई आउने दबाबलाई दसैँसँग जोडेर व्यंग्यसमेत गरे।

सरुवा बोर्ड गठन नभए आफ्नै इष्टमित्रबाट दसैँको टीका र आशीर्वाद नपाउने अवस्था आउन सक्ने भन्दै उनले सरकारलाई तत्काल निर्णय लिन आग्रह गरे।

‘सरकारलाई यो बोर्ड चाँडै गठन गर्न आग्रह छ। होइन भने यो पटकको दसैँमा आफ्नै इष्टमित्रबाट टीका र आशीर्वाद नपाइएला भन्ने पिर छ,’ उनले भने।

उनले सरुवा गरिदिन नसकेको भन्दै आशीर्वादको सट्टा आफूमाथि गाली र सराप आउने अवस्था नहोस् भन्दै सरकारसँग ठट्टा शैलीमा आग्रह गरे।

‘आशीर्वादको साटो उल्टै यसले हाम्रो कामै गरिदिएन भनेर सराप पो पाइने हो कि ! त्यसैले मलाई यो सरापबाट बचाउनु पर्‍यो सरकार,’ आचार्यले भने।