काठमाडौं । बैंकिङ प्रणालीमा अधिक तरलता भएपछि नेपाल राष्ट्र बैंकले आज बिहीबार २० अर्ब रुपैयाँ निक्षेप संकलन गर्ने भएको छ ।

केन्द्रीय बैंकले निक्षेप संकलन उपकरणमार्फत बैंक तथा वित्तीय संस्थाबाट उक्त रकम खिच्न लागेको हो । यसका लागि ब्याजदरमा बोलकबोल आह्वान गरिएको राष्ट्र बैंकले जनाएको छ ।

बोलकबोलमा ‘क’, ‘ख’ र ‘ग’ वर्गका बैंक तथा वित्तीय संस्था मात्रै सहभागी हुन पाउनेछन् । इच्छुक संस्थाले बिहीबार दिउँसो ३ बजेसम्म राष्ट्र बैंकको अनलाइन बिडिङ प्रणालीमार्फत बोलकबोल गर्नुपर्नेछ ।

बैंक तथा वित्तीय संस्थाले न्यूनतम १० करोड रुपैयाँदेखि अधिकतम २० अर्ब रुपैयाँसम्म बोलकबोल गर्न सक्नेछन् ।

साथै, बोलकबोल रकम १० करोड रुपैयाँले निःशेष भाग जाने हुनुपर्नेछ ।

राष्ट्र बैंकका अनुसार निक्षेप संकलन उपकरणको अवधि ३२ दिनको हुनेछ । यसअन्तर्गत संकलित साँवा र ब्याज कात्तिक ९ गते भुक्तानी गरिनेछ ।

बैंकिङ प्रणालीमा लगानीयोग्य रकम बढ्दै गएपछि तरलता व्यवस्थापन गर्न राष्ट्र बैंकले निक्षेप संकलन उपकरणमार्फत बजारबाट रकम खिच्दै आएको छ ।