काठमाडौं । कृषि सामग्री कम्पनी लिमिटेडले ३० हजार मेट्रिक टन युरिया मल खरिदका लागि अन्तर्राष्ट्रिय बोलपत्र आह्वान गरेको छ।

कम्पनीले बिहीबार सूचना जारी गर्दै ४६–०–० ग्रेडको युरिया मल खरिद तथा आपूर्तिका लागि अन्तर्राष्ट्रिय प्रतिस्पर्धात्मक बोलपत्र आह्वान गरेको हो। बोलपत्रमा योग्य आपूर्तिकर्ताले सहभागिता जनाउन सक्ने कम्पनीले जनाएको छ।

खरिद हुने मल भारतका कोलकाता वा हल्दिया बन्दरगाह हुँदै नेपाल ल्याउनुपर्नेछ। आपूर्तिकर्ताले विराटनगर, वीरगन्ज र भैरहवामा रहेका कृषि सामग्री कम्पनीका गोदामसम्म डीडीपी नेपाल आधारमा मल पुर्‍याउनुपर्नेछ।

अन्तिम गन्तव्यसम्मको ढुवानीसँगै बिमाको व्यवस्था पनि आपूर्तिकर्ताले नै गर्नुपर्नेछ।

कम्पनीका अनुसार बोलपत्र कागजात खरिदका लागि ४ लाख रुपैयाँ शुल्क तोकिएको छ। बोलपत्र जमानत भने २० हजार अमेरिकी डलर बराबरको हुनुपर्नेछ।

कम्पनीले बोलपत्रसम्बन्धी पूर्वबोलपत्र बैठक अक्टोबर १६, २०२६ मा दिउँसो २ बजे कुलेश्वरस्थित प्रधान कार्यालयमा आयोजना गर्ने जनाएको छ।

इच्छुक बोलपत्रदाताले अक्टोबर २६, २०२६ को दिउँसो १ बजेसम्म कम्पनीको प्रधान कार्यालयमा बोलपत्र पेस गर्नुपर्नेछ। प्राप्त बोलपत्र सोही दिन दिउँसो २ बजे खोलिनेछ।

बोलपत्र पेस गर्दा सार्वजनिक खरिद ऐन तथा नियमावलीअनुसार प्राविधिक र वित्तीय प्रस्ताव छुट्टाछुट्टै सिलबन्दी गरी बुझाउनुपर्नेछ।

बोलपत्रसम्बन्धी थप जानकारी कम्पनीको वेबसाइट वा प्रधान कार्यालयबाट लिन सकिने कृषि सामग्री कम्पनीले जनाएको छ।