काठमाडौं । राष्ट्रिय स्वतन्त्र पार्टीकी सांसद इन्दिरा राना मगरले झापाका किसान र सुकुमबासीले भोगिरहेका समस्याबारे सरकारको ध्यानाकर्षण गराएकी छन्।

शुक्रबार प्रतिनिधिसभाको बैठकमा बोल्दै उनले बाली भित्र्याउने समय नजिकिँदै गर्दा जंगली हात्तीको प्रवेशले किसानलाई थप त्रसित बनाएको बताइन्। हात्तीबाट बाली जोगाउन स्थानीय किसान रातभर जाग्राम बस्नुपर्ने अवस्था रहेको उनले सदनलाई जानकारी गराइन्।

रानाले हात्ती नियन्त्रणका लागि सरकारले गर्दै आएका प्रयास प्रभावकारी हुन नसकेको भन्दै क्षति न्यूनीकरणका लागि तत्काल ठोस कदम चाल्न माग गरिन्।

उनले झापामा जग्गासम्बन्धी समस्या पनि लामो समयदेखि कायमै रहेको बताइन्। जग्गाको निस्सा प्राप्त गरिसकेका सुकुमबासीलाई समेत लालपुर्जा दिनुको साटो पुनः नापजाँचलगायत प्रक्रियामा अल्झाइएको भन्दै उनले सरकारको ध्यानाकर्षण गराइन्।

स्थानीय तहबाट ‘माथिबाट आदेश आएको’ भन्दै नागरिकलाई अन्योलमा पार्ने खालका सूचना प्रवाह भइरहेको गुनासो आएको उल्लेख गर्दै उनले सम्बन्धित मन्त्रालयले यसबारे स्पष्ट धारणा सार्वजनिक गर्नुपर्ने बताइन्।

हात्ती नियन्त्रणका सरकारी प्रयासप्रति व्यंग्य गर्दै उनले अहिलेसम्मको काम ‘हात्ती आयो, हात्ती आयो फुस्स’ जस्तै भएको टिप्पणी गरिन्।

रानाले हात्तीबाट प्रभावित किसानलाई तत्काल राहत उपलब्ध गराउन र निस्सा पाइसकेका सुकुमबासीलाई लालपुर्जा वितरणको प्रक्रिया शीघ्र अघि बढाउन सरकारसँग माग गरिन्।

उनका अनुसार बाली जोगाउने चिन्तामा किसान रातभर जाग्राम बस्ने र जग्गाको स्वामित्वका लागि वर्षौँ कुर्नुपर्ने अवस्था अन्त्य गर्न सरकारले स्पष्ट कार्ययोजनासहित काम गर्न आवश्यक छ।