काठमाडौं । राष्ट्रिय स्वतन्त्र पार्टी (रास्वपा) का महामन्त्री विपीनकुमार आचार्यले पार्टीका नेता–कार्यकर्तालाई दम्भ र अहंकारबाट टाढा रहन सचेत गराएका छन्। नागरिकको अपेक्षा उच्च रहेकाले पार्टीमा आबद्ध कसैले पनि सानातिना कमजोरी गर्ने छुट नभएको उनको भनाइ छ।

आइतबार रुपन्देहीको सियारीमा आयोजित पार्टी कार्यक्रममा बोल्दै आचार्यले सञ्चारमाध्यम र आम नागरिकले पार्टीका नेता–कार्यकर्ताका गतिविधि नजिकबाट नियालिरहेको बताए। कमजोरी सार्वजनिक हुनु सुधारको अवसर भएकाले त्यसलाई सकारात्मक रूपमा लिनुपर्ने उनले उल्लेख गरे।

‘हामीसँग नागरिकको धेरै अपेक्षा रहेको छ। साना–साना कमजोरी पनि हामीलाई गर्ने छुट छैन। मिडियादेखि सबैले हाम्रा कमजोरी हेरिरहेको अवस्था छ,’ उनले भने, ‘रास्वपामा जोडिएका नेता, कार्यकर्ता मात्र होइन, शुभेच्छुकहरूले पनि यसमा विशेष ध्यान पुर्‍याउनुपर्नेछ।’

आचार्यले पार्टी र सरकारको कामलाई प्रभावकारी बनाउन सबैको साथ आवश्यक रहेको बताए। सरकारले गरेका सकारात्मक काम जनस्तरसम्म पुर्‍याउन र नागरिकका अपेक्षा पार्टी तथा सरकारसमक्ष राख्न स्थानीय कमिटीहरू थप संवेदनशील हुनुपर्ने उनको भनाइ थियो।