काठमाडौं । नेपाली कांग्रेसको १५औँ महाधिवेशन काठमाडौंको खुलामञ्चमा सुरु भएको छ। उद्घाटन समारोहमा सहभागी हुन विभिन्न राजनीतिक दलका नेता तथा प्रतिनिधिहरू खुलामञ्च पुगेका छन्।

उद्घाटन सत्रमा नेकपा एमालेका महासचिव शङ्कर पोखरेल सहभागी भएका छन्। त्यस्तै नेपाली कम्युनिस्ट पार्टीका संयोजक तथा पूर्वप्रधानमन्त्री पुष्पकमल दाहाल, राष्ट्रिय प्रजातन्त्र पार्टीका अध्यक्ष राजेन्द्र लिङदेन, पूर्वप्रधानमन्त्री डा. बाबुराम भट्टराई पनि कार्यक्रममा पुगेका छन्।

उद्घाटन समारोहमा पूर्वमन्त्री तथा नागरिक उन्मुक्ति पार्टीका नेता रेशम चौधरी र पूर्वअर्थमन्त्री रामेश्वर खनालको पनि उपस्थिति रहेको छ।

त्यस्तै नेपाल उद्योग वाणिज्य महासंघका अध्यक्ष अञ्जन श्रेष्ठसहित विभिन्न क्षेत्रका प्रतिनिधि तथा अतिथिहरू पनि खुलामञ्च पुगेका छन्।