काठमाडौँमा आईपुगे चिनियाँ कम्युनिष्ट पार्टीका शीर्ष नेता


काठमाडौं / चिनियाँ कम्युनिष्ट पार्टी (सीपीसी) का पोलिटब्यूरो सदस्य युआन च्या च्युन नेपाल आएका छन् । उनी तीन दिने भ्रमणका लागि आइतबार बिहान काठमाडौं आएका हुन् ।
उनी श्रीलंकाको भ्रमण सकेर नेपाल आएका हुन्। युआन चीनको चर्चित, ठूलो र शक्तिशाली सहरहरु मध्येको एक छोङछिङ सहरको प्रतिनिधिमण्डलको नेतृत्व गर्दै आएका हुन् ।
युआन छोङछिङ नगर कमिटीमा सीपीसीका सचिव हुन् । सचिव उक्त सहरको पार्टी प्रमुख हुने प्रावधान छ । सीपीसीका नेता युआनले कांग्रेस सभापति शेरबहादुर देउवा, एमाले अध्यक्ष केपी शर्मा ओली, नेकपा समाजवादी पार्टीका अध्यक्ष माधवकुमार नेपाललगायत विभिन्न पार्टीका नेताहरुसँग भेटवार्ता गर्ने कार्यक्रम रहेको छ ।
युआनले प्रधानमन्त्री तथा माओवादी अध्यक्ष पुष्पकमल दाहाललाई साउन ७ मा भेट्ने कार्यक्रम रहे पनि दाहाल शनिबारै इटाली लागेपछि प्रधानमन्त्रीसँग भने भेटवार्ता नहुने भएको छ ।