गाजामा हमासविरुद्ध इजराइली सैन्य कारबाहीका बीच भारतले जारी द्वन्द्वमा नागरिकहरूको मृत्युको कडा निन्दा गर्दै यस क्षेत्रमा द्वन्द्वको परिणामले हुने मानवीय सङ्कट ‘सामान्यतः अस्वीकार्य’ भएको बताएको छ ।

“गाजामा सात महिनाभन्दा लामो समयदेखि द्वन्द्व चल्दा मानवीय सङ्कट बढ्दै गएको छ । यस क्षेत्रलगायत बाहिरसमेत अस्थिरता बढ्ने सम्भावना छ । यस सन्दर्भमा हामीले राष्ट्रसङ्घीय सुरक्षा परिषद् (युनएससी) ले प्रस्ताव गरेको २७२८ लाई सकारात्मक कदमका रूपमा ग्रहण गर्न विचार गरिरहेका छौँ”, राष्ट्रसङ्घका लागि भारतका स्थायी प्रतिनिधि रुचिरा कम्बोजले प्यालेस्टाइनमा दशौँ राष्ट्रसङ्घीय महासभा (युएनजिए) को आपत्कालीन विशेष सत्रमा भन्नुभयो ।

“द्वन्द्वमा भारतको स्थिति हाम्रो नेतृत्वद्वारा एकभन्दा बढी अवसरमा स्पष्टरूपमा व्यक्त गरिएको छ, इजराइल र हमासबीचको द्वन्द्वले ठूलो मात्रामा नागरिकको ज्यान गएको छ, मानवीय सङ्कटको परिणाम बिल्कुल अस्वीकार्य छ, हामीले द्वन्द्वमा सर्वसाधारणको मृत्युको कडा निन्दा गरेका छौँ र सबैले सबै परिस्थितिमा अन्तर्राष्ट्रिय मानवीय कानूनको सम्मान गर्नुपर्छ”, उहाँले भन्नुभयो ।

इजराइलमाथि अक्टोबर ७ मा भएको आक्रमणलाई स्पष्ट पार्दै कम्बोजले इजराइलमा हमासको आक्रमण पनि स्पष्ट निन्दायोग्य रहेको र आतङ्कवाद तथा बन्धक बनाउने कुनै औचित्य नभएको कुरामा जोड दिनुभयो ।

यस मामिलामा दुई–राज्य समाधानमा भारतको स्थितिलाई दोहोर्याउँदै उहाँले द्वन्द्वका पक्षहरूलाई प्रत्यक्ष शान्ति वार्ताका लागि सकेसम्म चाँडो संलग्न हुन आग्रह गर्नुभयो ।

अन्तिम स्थितिका मुद्दामा दुवै पक्षबीच अर्थपूर्ण वार्ताको माध्यमबाट प्राप्त समाधानले मात्र स्थायी शान्ति प्रदान गर्ने कुरामा बारम्बार जोड दिएको उहाँले बताउनुभयो ।

इजराइलको सुरक्षा आवश्यकतालाई ध्यानमा राख्दै प्यालेस्टिनीको सीमाभित्र स्वतन्त्र देशमा स्वतन्त्ररूपमा बस्न सक्ने दुई–राज्य समाधानलाई समर्थन गर्न भारतको प्रतिबद्धता व्यक्त गर्दै उहाँले स्थायी समाधानमा पुग्न र शान्ति वार्ता पुनः सुरु गर्न उहाँले आग्रह गर्नुभयो