अमेरिकी राष्ट्रपति डोनाल्ड ट्रम्पसँगको अलास्का शिखर सम्मेलनमा रुसी राष्ट्रपति भ्लादिमिर पुटिनका अङ्गरक्षकहरूले उनको मल फोहोर सङ्कलन गर्न विशेष सुटकेस बोकेका थिए भन्ने रिपोर्ट सार्वजनिक भएको छ ।

द एक्सप्रेस युएसका अनुसार, यो अनौठो सुरक्षा उपायको उद्देश्य विदेशी शक्तिहरूलाई पुटिनको स्वास्थ्यबारे जानकारी लिनबाट रोक्नु हो । रिपोर्टमा भनिएको छ, “पुटिनका अङ्गरक्षकहरूले विदेश यात्रामा उनले प्रयोग गरेका मानव फोहोरहरू सङ्कलन गर्छन्, विशेष झोलामा भण्डारण गर्छन् र सुटकेसमार्फत रुस फर्काउँछन् ।”

फ्रान्सेली प्रकाशन ‘पेरिस म्याच’ का पत्रकार रेजिस जेन्टे र मिखाइल रुबिनलाई उद्धृत गर्दै यो अभ्यास नयाँ नभएको बताइएको छ । सन् २०१७ मा पुटिनको फ्रान्स भ्रमणमा समेत यस्तो उपाय प्रयोग भएको थियो ।

पत्रकार फरिदा रुस्तामोभाले पनि पुटिनले भियना भ्रमणका क्रममा पोर्टेबल शौचालय प्रयोग गरेको बताएकी हुन् । उनले स्रोतलाई उद्धृत गर्दै भनेकी छिन्, “राष्ट्रपतिले सन् १९९९ देखि नै यस्तो अभ्यास सुरु गरेका थिए।”

पुटिनको उमेर ७२ वर्ष भइसकेको छ र उनको स्वास्थ्यबारे लगातार अड्कलहरू भइरहेका छन् । गत वर्ष काजकिस्तानको अस्तानामा पत्रकार सम्मेलनमा उनको खुँट्टा अनियन्त्रित रूपमा हल्लिएको देखिएपछि पार्किन्सन रोगजस्ता न्युरोलोजिकल समस्या हुनसक्ने चर्चा चलेको थियो ।

यसअघि पनि विभिन्न अन्तराष्ट्रिय बैठकमा पुटिनलाई आफ्नो सिटमा अस्वाभाविक रूपमा हल्लाइरहेको देखिएको थियो । सन् २०२२ मा त क्रेमलिनले सामाजिक सञ्जालमा फैलिएका ‘स्वास्थ्यसम्बन्धी अफवाहहरू’ खारेज गर्न आधिकारिक रूपमा वक्तव्य नै जारी गरेको थियो ।

सुरक्षा र स्वास्थ्यसम्बन्धी यस किसिमको खबर फेरि चर्चामा आउनु भनेको पुटिनको नेतृत्व र व्यक्तिगत अवस्थाबारे बाहिरी अनुमान अझै जारी रहेको सङ्केत हो ।