काठमाडौं । सिंहदरबार अगाडि प्रहरीको राइफल बोकेर जेनजी आन्दोलनका क्रममा प्रदर्शन गरेका राजु परियार भनिने ३६ बर्षीय ‘सम्राट’, एक महिनाको खोजीपछि पक्राउ परेका छन् । काठमाडौं उपत्यका अपराध अनुसन्धान कार्यालयको ललितपुर शाखाले सुनाकोठीबाट उनलाई पक्राउ गरेको हो । पक्राउपछि परियारले आफू नै राइफलसहितको फोटो र भिडिओमा देखिएको व्यक्ति भएको स्वीकार गरेका छन् ।

प्रहरीका अनुसार परियारले जेनजी आन्दोलनको बेला प्रहरीको सेल्फ लोडिङ राइफल (SLR) लुटेर प्रदर्शन गरेका थिए । उक्त दृश्य सार्वजनिक भएपछि प्रहरी अनुसन्धानमा जुटेको थियो । अनुसन्धानका क्रममा परियारले प्रारम्भिक बयानमा हतियार सेना समक्ष बुझाएको बताएका छन् । तर, सेनाबाट उक्त राइफल पुनः प्रहरीले नपाएको स्रोतको दाबी छ ।

अपराधिक इतिहासको लामो सूची
क्राइम रेकर्ड सिस्टम (CRS) अनुसार, परियारको नाममा यसअघि नै ज्यान मार्ने उद्योगदेखि ठगी र अभद्र व्यवहारसम्मका ८ वटा मुद्दा दर्ता छन् ।
–ज्यान मार्ने उद्योगमा काठमाडौं र ललितपुर परिसरमा मुद्दा दर्ता
–गंगामाया देउलाको जाहेरीमा एक मुद्दा काठमाडौं परिसरमा
–बानेश्वर, महाराजगञ्ज, ललितपुर, स्वयम्भू प्रहरी वृत्तहरूमा ठगी र बैंकिङ कसुरका अन्य मुद्दा
–अभद्र व्यवहारका दुई फरक मुद्दा पनि ऋच्क् मा सूचीकृत

प्रहरीका अनुसार, परियारले सवारी अनुमति पत्र (लाइसेन्स) बना इदिने भन्दै रकम ठगी गर्ने गरेको खुलेको छ। उनले बिचौलियाका रूपमा काम गर्दै सर्वसाधारणबाट पैसा असुलेको आरोप छ ।

अदालतबाट म्याद लिएर अनुसन्धान
उनीविरुद्ध काठमाडौं जिल्ला अदालतबाट आपराधिक उपद्रव अन्तर्गत म्याद लिएर अनुसन्धान प्रक्रिया अघि बढाइएको छ । अनुसन्धानपछि उनलाई सम्बन्धित कसुरअनुसार मुद्दा चलाइनेछ ।