काठमाडौँ – नेपाली कांग्रेसका वरिष्ठ नेता तथा पूर्वमहामन्त्रीद्वय प्रकाशमान सिंह र कृष्णप्रसाद सिटौलाले मुलुकमा देखिएको राजनीतिक अनिश्चितता अन्त्य गरी तोकिएको मितिमा निर्वाचन सम्पन्न गर्न÷गराउन सरकारलाई आग्रह गर्नुभएको छ ।

नेपाली कांग्रेसका संस्थापक नेता, प्रजातान्त्रिक आन्दोलनका अग्रदूत तथा लौहपुरुष गणेशमान सिंहको १११औँ जन्मजयन्तीका अवसरमा आयोजित समारोहमा उहाँहरूले मुलुकलाई स्थायित्व र सुशासनको मार्गमा अघि बढाउनका लागि समयमै निर्वाचन सम्पन्न गर्नु अत्यावश्यक रहेको धारणा राख्नुभयो ।

पूर्वमहामन्त्री सिंहले मुलुक अहिले गम्भीर राजनीतिक सङ्कट र अनिश्चितताको परिस्थितिबाट गुज्रिरहेको उल्लेख गर्दै त्यसको समाधान निर्वाचन भएको बताउनुभयो । उहाँले भन्नुभयो, “आफ्नो प्रतिनिधि चुन्ने जनताको अधिकारलाई कार्यान्वयन गर्ने माध्यम निर्वाचन हो । त्यसैले निर्वाचनलाई तोकिएको समयमा सम्पन्न गर्न नसक्दा लोकतान्त्रिक मूल्य र संविधानमाथिको विश्वासमा असर पर्न सक्छ ।”

पूर्वमहामन्त्री सिटौलाले वर्तमान राजनीतिक अवस्था अत्यन्त जटिल बन्दै गएको उल्लेख गर्दै सबै राजनीतिक दलहरूबीच सहमति, सहकार्य र आपसी विश्वास कायम गरी अघि बढ्नुपर्ने आवश्यकता औँल्याउनुभयो । उहाँले भन्नुभयो, “मुलुकलाई स्थिर सरकार र दीर्घकालीन समाधानको आवश्यकता छ । त्यो मार्ग निर्वाचनबाट मात्रै सम्भव छ । त्यसैले तोकिएकै समयमा निर्वाचन सम्पन्न गर्न सबै पक्षले इमान्दार भएर प्रयास गर्नुपर्छ ।” उहाँले प्रधानमन्त्री सुशीला कार्की नेतृत्वको सरकारलाई पनि निर्वाचन मिति सार्ने वा टार्ने कुनै पनि कदम नचाल्न आग्रह गर्नुभयो ।

आगामी फागुन २१ गते तोकिएको निर्वाचनलाई सफल र विश्वसनीय बनाउन सबै दल, निर्वाचन आयोग, सुरक्षा निकाय र नागरिक समाजबीच समन्वय तथा विश्वासको वातावरण सिर्जना गर्नुपर्नेमा उहाँहरूले जोड दिनुभयो ।

पूर्वमहामन्त्रीद्वयले गणेशमान सिंहको बलिदान, त्याग र लोकतन्त्रप्रतिको योगदान स्मरण गर्दै उहाँका आदर्शलाई आत्मसात् गर्नुपर्ने आवश्यकता पनि औँल्याउनुभयो । गणेशमान सिंहले जीवनभर प्रजातन्त्र र जनअधिकारका लागि सङ्घर्ष गर्नुभएको थियो र उहाँकै बाटो पछ्याउँदै अहिलेका नेताहरूले पनि जनताको भरोसा कायम राख्ने काम गर्नुपर्ने पूर्वमहामन्त्रीद्वयले बताउनुभयो ।

कार्यक्रममा नेपाली कांग्रेसका विभिन्न तहका नेता, कार्यकर्ता, शुभेच्छुक तथा लोकतान्त्रिक आन्दोलनका अभियन्ताको उपस्थित थियो ।