`

श्रीमान रोजगारीका लागि साउदीमा, परिवारकै सदस्यबाट महिलाको वीभत्स हत्या

Nepal One HD ९ मंसिर २०८२ १६:३१
अपराध

रौतहट । रौतहटको वृन्दावन नगरपालिका–९ भुसाहामा एक महिलाको परिवारकै सदस्यहरूको संलग्नतामा भएको विभत्स हत्या पछाडि लुकेको रहस्य बाहिर आएको छ । रोजगारीका लागि विदेशमा रहेका बेला परिवारका सदस्यहरूले योजनाबद्ध रूपमा हत्या गरी घरकै भुस राख्ने कोठाभित्र खाडल खनेर गाडेको अवस्थामा महिलाको शव भेटिएको हो ।

मृतक २५ वर्षीया तरीमा खातुन, भुसाहा निवासी शेख आदिलकी पत्नी हुन् । आदिल रोजगारीका सिलसिलामा साउदी अरबमा कार्यरत छन् । सोमबार राति हत्या गरिएपछि मंगलबार बिहान स्थानीयले शंका व्यक्त गरेपछि इलाका प्रहरी कार्यालय गरुडा र जिल्ला प्रहरी कार्यालय रौतहटको संयुक्त टोली घटनास्थल पुगेको थियो । त्यही क्रममा खातुनको शव भुस राख्ने स्थानको खाडलभित्र पुरिएको अवस्थामा भेटिएको प्रहरीले जनाएको छ ।

हत्या भएको रातदेखि नै खातुनका ससुरा शेख अली मोहम्मदसहित घरका सबै सदस्य फरार रहेका छन् । उनीहरूले मृतक खातुनका डेढ वर्षीय छोरा मोहम्मद आरिफलाई समेत लिएर भागेको प्रहरी उपरीक्षक रविन कार्कीले जानकारी दिए । फरार परिवारजनको खोजी तीव्र पारिएको प्रहरीले बताएको छ ।
घटनाको मूल कारण भने करिब एक महिनाअघि माइतीतर्फ भएको विवाह समारोहकै दिन देखिएको विवादलाई मानिएको छ । कात्तिक १८ गते, समारोहका बेला खातुन नातामा भतिजो पर्ने गुड्डु भनिने शेख अलाहुदिनसँग ‘अनैतिक सम्बन्ध’ राखिरहेको अवस्थामा भेटिएको दाबी परिवारजनले गरेका छन् । विवाद बढेपछि दुवैले विवाह गर्ने मौखिक सहमति गरेको र त्यसपछि खातुनलाई ससुरा अली मोहम्मदको जिम्मामा छाडिएको मृतकका बुबा ताज मोहम्मदले बताए ।

घटनाको रात खातुनका भाइ शेख आस मोहम्मद दिदीको घरमा भेटघाटका लागि पुगेका थिए । त्यही बेला उनले दिदीमाथि परिवारका सदस्यहरूले कुटपिट गर्दै हत्या गरिरहेको देखेको दाबी गरेका छन् । रोक्न प्रयास गर्दा ‘हल्ला गर्‍यौं भने तिमीलाई पनि मारिदिन्छौं’ भन्दै धम्की दिएपछि उनी घरबाट भागेर ज्यान जोगाउन सफल भएको परिवारजनले बताएका छन् । हत्या भएको प्रमाणका रूपमा आस मोहम्मदले दिदीको अवस्था देखिने तस्बिर माइतीतर्फ पठाएको पनि परिवारजनको भनाइ छ ।

प्रहरीका अनुसार खातुनका दाहिने खुट्टामा गहिरो चोट लागेको थियो भने टाउकोमा धारिलो हतियार प्रहार गरी हत्या गरिएको प्रारम्भिक अनुसन्धानबाट खुलेको छ । घटनास्थलबाट एक चक्कु समेत बरामद गरिएको प्रहरीले जनाएको छ । खातुनको शवलाई पोष्टमार्टमका लागि चन्द्रनिगाहपुर अस्पतालमा राखिएको छ । प्रहरीले फरार सबै परिवार सदस्यहरूको खोजीका लागि विशेष टोली परिचालन गरेको जनाएको छ ।

 

 


प्रतिक्रिया

Leave a Reply

Your email address will not be published. Required fields are marked *