काठमाडौं । राष्ट्रिय प्रजातन्त्र पार्टी (राप्रपा) नेतृ खुस्बु ओलीले भदौ २३ र २४ गतेको जेनजी आन्दोलनका दोषीमाथि कारबाही नभएसम्म चुनाव हुन नदिने चेतावनी दिएकी छिन् । राप्रपाले आज (मंगलबार) काठमाडौंमा आयोजना गरेको विरोध सभामा नेतृ ओलीले भदौ २४ को आन्दोलनपछि पनि कांग्रेस–एमाले नेताको अहंकार नसकिएको बताइन् ।

‘भदौ २४ नेताहरू भाग्नु पर्ने अवस्था के कारणले आयो ? कांग्रेस–एमाले र माओवादीको सिण्डिकेटका कारण भदौ २४ गतेको घटना निम्तियो,’ ओलीले भनिन्, ‘भदौ २४ गते राज्यविहीनताको अवस्थामा जनताले किन राजा र सेनालाई सम्झे किन राष्ट्रपतिलाई सम्झेनन् ?’ ओलीले भदौ २४ गतेको नरसंहारका दोषीलाई कारबाही नहुँदासम्म चुनाव हुन नसक्ने र चुनाव हुन नदिने दाबी गरिन् । राजा, राजनीतिक दल र जेनजीबीच नवीन समझदारीको माग गर्दै राप्रपाले काठमाडौंमा विरोध कार्यक्रम आयोजना गरेको हो ।