काठमाडौँ। नेपालका स्टार लेग–स्पिनर सन्दीप लामिछाने सन् २०२६ को सिजनका लागि बंगलादेश प्रिमियर लिग (बीपीएल) टोली राजशाही वारियर्ससँग अनुबन्धित भएका छन्।

राजशाही वारियर्सले आइतबार सामाजिक सञ्जालमार्फत नयाँ सिजनका लागि लामिछानेलाई अनुबन्ध गरेको पुष्टि गरेको हो।

टोलीले आफ्नो पोस्टमा लेखेको छ,‘हिमालयन म्याजिक सन्दीप लामिछाने, नेपाल-स्वागत छ। तपाईं खेल हेरिरहनु मात्र होइन, यो लडाइँको हिस्सा हुनुहुन्छ। राजशाही वारियर्सलाई पछ्याउनुहोस् र सँगै गौरवको खोजी गरौँ।’

लामिछाने बीपीएल ड्राफ्टका लागि दर्ता भएका पाँच नेपाली खेलाडीमध्ये एक थिए। उनीसँगै दीपेन्द्र सिंह ऐरीलगायतले नाम दर्ता गरेका थिए। अक्सनमा लामिछाने नबिके पनि राजशाही वारियर्सले पछि ड्राफ्टबाहिरबाट उनलाई अनुबन्ध गरेको हो। यसअघि सन् २०१९ मा लामिछानेले बीपीएलकै सिलेट टाइटन्सबाट खेलेका थिए ।

लामिछाने नेपालका सबैभन्दा धेरै अन्तर्राष्ट्रिय फ्रेन्चाइज लिग खेल्ने क्रिकेटरमध्ये एक हुन्। उनले इन्डियन प्रिमियर लिगमा दिल्ली क्यापिटल्स, अष्ट्रेलियाको बिग ब्यास लिगमा मेलबर्न स्टार्स र होबार्ट हरिकेन्स, क्यारेबियन प्रिमियर लिगमा जमैका टालावाह्स, सेन्ट किट्स एन्ड नेभिस प्याट्रियट्स र बार्बाडोस ट्राइडेन्ट्स, ग्लोबल टी-२० क्यानडामा मोन्ट्रियल टाइगर्स र भ्यानकुभर नाइट्स, तथा पाकिस्तान सुपर लिगमा लाहोर कलन्दर्सका लागि खेलिसकेका छन्।

उनले आईपीएलसहित क्यारिबियन प्रिमियर लिग सीपीएल, बिग ब्यास लिग बीबीएल र क्यानडाको ग्लोबल टी–२० लिग जस्ता प्रमुख प्रतियोगिताहरूमा सहभागिता जनाइसकेका छन् ।

बंगलादेशका प्रशंसकहरूले लामिछानेलाई पछिल्लो पटक २०२४ को आईसीसी टी–२० विश्वकपमा नजिकबाट हेरेका थिए, जहाँ नेपालले समूह चरणमा बंगलादेशको सामना गरेको थियो । त्यस खेलपछि लामिछाने बंगलादेशी कप्तान नजमुल हुसेन शान्तोसँग लामो कुराकानीमा देखिएका थिए । उनै शान्तोले आगामी बीपीएल सिजनमा राजशाही वारियर्सको नेतृत्व गर्नेछन् र अब यी दुई टोली साथी बन्नेछन् ।

बंगलादेश प्रिमियर लिगको नयाँ सिजन डिसेम्बर २६ मा सुरु हुँदै छ ।