नेपाली काँग्रेसले महामन्त्रीद्वय विश्वप्रकाश शर्मा र गगन थापालाई पार्टीको निर्णयविरुद्धमा नजान चेतावनी दिएको छ । मंगलबार पार्टी एकीकृत बनाएर लैजाने बारे विभिन्न चरणमा छलफल भएको बताउँदै बुधवार बिहानसम्म सहमतिका साथ अघि बढ्न आग्रह गरेको हो ।

महामन्त्रीद्वयले पार्टीको केन्द्रिय समितिले गरेको बैठकको निर्णय नमाने अन्य निर्णय लिनुपर्ने पार्टीका प्रवक्ता डा. प्रकाशशरण महतले चेतावनी दिए । वार्ता र संवादबाट नै सहमति खोज्नका लागि संस्थापन पक्षले अधिक लचकता देखाइरहेको उल्लेख गर्दै उनले सम्पूर्ण पार्टी पंक्ति एक भएर निर्वाचनमा जानुपर्ने बताए । अहिले विभाजन र विग्रहतर्फ उन्मुख हुने बेला नभएको उनले बताए ।

अझै आफूहरु सकारात्मक नतिजा निस्किनेमा आशावादी रहेको भन्दै समग्र पार्टीलाई जोडेर आम निार्वचनमा जाने र राम्रो परिणाम हाँसिल गरेपछि नियमित अधिवेशनबाट नयाँ नेतृत्व चयन हुने दोहोर्‍याए।

उनले भने, ‘वार्ता र संवाद नेतृत्व तहबाट भइ नै रहेको छ । आज छलफल गर्दै गर्दा पनि हाम्रो कोशिस छलफल गरेर सम्पूर्ण पार्टी पंक्ति एक भएर जानुपर्छ । त्यसपछि अधिवेशन गरेर नयाँ नेतृत्व चयन गर्नुपर्ने भन्नेमा स्पष्ट छौँ । एकातिर विशेष अधिवेशन भनेर गरिरहँदा हाम्रो नेतृत्वले अहिले विभाजन र विग्रहतर्फ उन्मुख हुने होइन,अहिले एक हुने बेला हो ।’

यसै किसिमले सम्पूर्ण पार्टीको तलदेखि माथिसम्मको कमिटीलाई आह्वान गरिएको महतको भनाई छ। अझै पनि सकारात्मक नतिजा निस्किन्छ की भन्ने आशा रहेको उनले बताए ।

पार्टी नेतृत्व समग्र पार्टीलाई जोडेर हामी आम निर्वाचनमा जान आग्रह गर्दै महतले सबै एकजुट भएपछि पार्टीको पक्षमा राम्रो परिणाम आउने बताए । ‘त्यसपछि पार्टीको नियमित अधिवेशनबाट नयाँ नेतृत्व आउँछ, अब विग्रहको बाटोमा जानुहुन्न ,’ उनले भने, ‘स्वभाविक, मजुबत गर्ने विषयलाई पार्टी केन्द्रिय समितिले समावेश गरेर अघि बढ्नसक्छ । राति बेलुकासम्म पनि समझदारी बन्छ भने अन्यथा निर्णयमा किन जाने भन्ने नेतृत्वको लचकता रहेको छ ।’

केन्द्रिय कार्य समितिको बैठक बुधबार बिहान फेरि बस्नेछ ।