काठमाडौं । नेपाली कम्युनिष्ट पार्टी (नेकपा) छाडेका नेता रहबर अन्सारी राष्ट्रिय स्वतन्त्र पार्टी (रास्वपा) मा प्रवेश गरेका छन् । उनले मधेशमा विकासको नयाँ विगुल फुक्ने लक्ष्यसहित पार्टीमा आफ्नो यात्रा सुरु गरेका हुन् । सोमबार जनकपुरमा आयोजित रास्वपाको परिवर्तन उद्घोष सभामा अन्सारीले भने, ‘हिजो धेरै भाषण गरिए, तर मधेशी जनताको सपना जमिनमुनि गाडिएको छ । अब हामी सबैको इमानदार नेतृत्व र निष्ठापूर्वक प्रयासले ती सपना निकालेर ज्वालामुखीझैं मधेशबाट देशभर विकासको विगुल फुकाउनेछौँ ।’

अन्सारीले मधेशमा नयाँ नेतृत्वको आवश्यकतालाई जोड दिँदै पार्टी सभापति रवि लामिछाने र वरिष्ठ नेता बालेन शाहको क्षमतामा विश्वास व्यक्त गरे । उनले भने, ‘रास्वपा शान्ति र निलो रंगले चिनिन्छ । आज मधेशले आफ्नो छोरा देशको नेतृत्वको केन्द्रमा देख्न चाहन्छ । रवि लामिछानेको त्याग र बालेन शाहको क्षमता मधेशले पहिचान गरेको छ । मधेशले संघर्ष र परिवर्तनको शक्ति बुझेको छ ।’

नेता अन्सारीले जनकपुरमा सभामा सहभागी जनतालाई जानकारी दिए अनुसार, उनले आफ्नो पुरानो पार्टीसँग मधेश प्रदेशसभाबाट पनि राजीनामा दिएका थिए । अब उनी बारा–४ बाट रास्वपाको उम्मेदवार बन्ने तयारीमा छन् । अन्सारीले रास्वपा मात्रै वर्तमान र भविष्यको परिवर्तनको माध्यम बन्न सक्नेमा विश्वास व्यक्त गरे । उनको रास्वपामा प्रवेशसँगै पार्टीले मधेशबाट जनादेशको सम्भावनालाई बलियो बनाउन अग्रसरता लिएको देखिन्छ । अन्सारीले आफ्नो भाषणमा मधेशी जनताको सपना र क्षेत्रको विकासलाई प्राथमिकता दिने प्रतिबद्धता दोहो¥याए ।